Për gati tre muaj, mijëra studentë e qytetarë po qëndrojnë rrugëve të Beogradit.
Përmes këtyre protestave, ata po kërkojnë përgjegjësi për tragjedinë që ndodhi në Novi Sad më 1 nëntor të vitit të kaluar, ku humbën jetën 15 persona nga shembja e një strehe në stacionin hekurudhor.
E të martën, si shkak i këtyre protestave masive kryeministri i Serbisë, Millosh Vuçeviq dha dorëheqje.
Menjëherë pas tij, dorëheqje dha edhe i pari i komunës së Novi Sadit, Millan Gjuriq.
Por këto dorëheqje duket që nuk do mjaftojnë për ndaljen e protestave.
“Ne si studentë të Universitetit Filozofik nuk kemi ndonjë koment të veçantë (për dorëheqjen). Thjesht duam të themi se kjo nuk ishte kërkesa jonë, nuk duam ndryshimin e qeverisë, duam vetëm të plotësohen kërkesat tona”.
Që dorëheqja e Vuçeviqit është e pamjaftueshme e thotë edhe profesori i Fakultetit të Kimisë, Branimir Jovanciceviq.
“Nëse presidenti mendon se duke zëvendësuar një figurë, në thelb, të parëndësishme, pavarësisht se ai mban një post të rëndësishëm, ai do ta zgjidhë problemin në Serbi që ai personalisht të mbetet në pushtet, ai gabon thellë. Kjo duhet të çojë në ndryshime totale politike sepse autokracia dhe diktatura në Serbi në zemër të Evropës duhet të ndalet”, ka deklaruar ai.
Për njohësin e zhvillimeve politike, Valon Arifi kjo është njëra nga protestat më të mëdha në rajon.
Arifi thotë se fuqia e kësaj proteste është që nuk janë të përfshirë politikanët.
Organizatorët dhe studentët vazhdimisht po bëjnë thirrje në rrjete sociale se protestat do të vazhdojnë.
Ndërsa është raportuar, se shumë prej protestuesve janë sulmuar gjatë vendosjes së pankartave në qytet.
