Targat e automjeteve që po hyjnë nga Serbia në Kosovë janë nga Rashka e Beogradi.
Por qarkullimi në pikën kufitare të Jarinjës të mërkurën ishte më i ulët se zakonisht.
Mos shfrytëzimi i këtij kufiri erdhi pas kërkesës së Qendrës Kombëtare për Menaxhim Kufitar për të shmangur përdorimin e këtij pikëkalimi kufitar për shkak të protestave në Kralevë të Serbisë.
“Bazuar në njoftimet e marra, sot më datë, 28.01.2025 rruga në Kralevë / SRB është bllokuar nga protestues, të cilët nuk lejojnë qarkullimin e automjeteve. Me qëllim të evitimit të kësaj rruge dhe pengesave në rrugë që shpijnë në PKK Jarinje, inkurajojmë udhëtarët që të shfrytëzojnë PKK tjera, deri në njoftim tjetër. Ju falënderojmë për bashkëpunim. Për më shumë kontaktoni në numrat 045198000, 045198606 dhe në numrin pa pagesë 080050095”, është thënë Qendrës Kombëtare për Menaxhim Kufitar.
Që protesta ka filluar në Kralevë e thotë edhe një qytetar që erdhi me familje nga Beogradi.
“Ka protesta në Kralevë por ne kemi kaluar para se të arrijmë te protesta përmes një rruge alternative, ajo është rruga që e lidhë Kralevën dhe Rashkën dhe ne kemi kaluar pa problem”, tha ky qytetar.
Pa problem erdhi në Kosovë edhe një qytetar tjetër serb.
“Jo nuk ka asgjë,andej nga erdha unë është krejt e lirë”, tha një qytetar serb.
Për të shmangur bllokimin e autostradës në Kralevë edhe shoferët e kamionëve përdorën rrugët dytësore.
“Po po ka protestë, dola rrugës tjetër dhe kalova”, u shpreh një shofer kamioni.
E shoferi i një autobusi që po udhëton nga Kosova për në Serbi nuk e dinte për protesta.
“Unë nuk e di ku është protesta, unë nuk do të shkoj në Kralevë, ndalesën e kam në Novi Pazar”, tha ai.
Televizioni e ka pyetur edhe Policinë e Kosovës për qarkullimin e veturave në këtë pikë kufitare mirëpo të njëjtit nuk kanë dhënë detaje.
