Më 14 shtator do të mbahet një protestë para Gjykatës Speciale në Hagë. Nënkryetari i OVL-UÇK-së, Gazmend Syla, ka thënë se kjo iniciativë ka ardhur nga bashkëluftëtarë të Ushtrisë Çlirimtare të Kosovës që jetojnë në mërgatë.
“Kjo ka qenë ideja e disa bashkëluftëtarëve tanë që janë në mërgatë. Ata na treguan neve, e diskutuam dhe na erdhi ideja që të vazhdojmë protestën për kundërshtimin tonë ndaj padrejtësive që po ndodhin në Speciale”, tha Syla në emisionin “Ditari” në Tëvë1.
Sipas tij, organizatorët në mërgatë kanë bërë kërkesë te autoritetet kompetente në Holandë dhe tashmë kanë mundësi financiare dhe organizuese të mira për mbajtjen e protestës.
“Pritjet janë shumë të mëdha. Që kur e kemi publikuar dje në media që do ta mbështesim këtë protestë, kemi pasur shumë komunikim me bashkëluftëtarë dhe mërgimtarë tanë që jetojnë atje dhe kanë shprehur gatishmëri. Presim protestë të madhe”, u shpreh Syla.
Ai shtoi se përveç organizimit në Holandë, përkrahja po vjen nga shumë vende të tjera të Evropës dhe të botës.
“Me Gjermaninë dhe Zvicrën kemi pasur komunikim më së shumti, pastaj do të vijnë të organizuar edhe prej Amerikës. Sidomos kemi komunikim me vendet e Evropës si me atë të Francës, Belgjikës”, tha nënkryetari i OVL-UÇK-së.
Syla theksoi se në protestë pritet të marrin pjesë mërgimtarët që më 7 gusht nuk arritën të ishin në Prishtinë, duke i dhënë kësaj nisme një dimension ndërkombëtar. /teve1.info/
