Mesdita e së premtes i bëri bashkë serbët e veriut. Me simbole të shtetit serb dhe pankarta në duar, nga tre anët e Mitrovicës së Veriut, ata u bënë bashkë për të marshuar në sheshin “Car Lazar”.
Pankarta kryesore ishte kundër kryeministrit Albin Kurti, “Kurti, e ke shkelur Marrëveshjen e Brukselit. Ke shkatërruar gjithçka.”
Prijës i protestës, ishte vartësi i tij, ministri për Komunitete dhe Kthim, Goran Rakiç, për të kundërshtuar vendimin e Qeverisë së Kosovës për mosmbajtjen e zgjedhjeve parlamantare dhe presidenciale serbe në Kosovë.
“Nuk na kanë frikësuar do të rrimë këtu të bashkuar dhe do të luftojmë për të drejtat tona. I dërgoj mesazh Prishtinës dhe Kurtit dhe Policisë së Kosovës se nuk na kanë frikësuar. Do të rrimë këtu të bashkuar. Atë që e kanë shqiptarët duam edhe ne, nuk duam asgjë më shumë, t’i marrim apo t’i rrëmbejmë dikujt. Duam atë që na takon, paqen më së pari. Pas takimit me Vuçiqin për herë të parë mbase nuk arritur marrëveshje të përbashkët. Edhe pse i besojmë vetëm atij, nga ajo mbledhje kemi dalë pa marrëveshje”, tha ai.
E nga veriu, Rakiç, kërkoi ndihmë nga presidenti serb, Aleksandër Vuçiq.
“Ne nuk jemi t’i që shkelim marrëveshjen e Brukselit, Kurti po e bën. Do të rrimë me popullin tonë dhe do ta mbështesim. Kryetar Vuçiq ju lusim ndikoni në BE dhe bashkësinë ndërkombëtare, nuk jemi të frikësuar, jemi në vendin tonë dhe do të rrimë këtu”, tha ai.
Ai njëherit tha se përfaqësuesit serbë që punojnë në institucionet e Kosovës nuk do të dalin në punë derisa të kthehet në detyrën e saj gjyqtarja e suspenduar Lilljana Stevanoviq.
Por që këtë e demantoi, nënkryetarja e Komunës së Mitrovicës së Veriut, Adriana Hoxhiq.
“Deklarata e Rakiq flet për stafin politik, ndërkaq stafi civil ka dalë në punë dhe është në shërbim të qytetarëve. Sot në komunë kanë dalë në punë dhe o punohet si çdo ditë tjetër”, tha Hoxhiq.
Forca të Policisë së Kosovës, kishte në të gjitha anët e qytetit, për të siguruar mbarëvajtjen e protestës.
Raporti i gazetares Florijeta Dernjani.
