Muaj më parë me aksione policore iu konfiskuan pronat që i kishte në veri të vendit.
Shteti kishte sekuestruar pasuritë e paluajtshme të kryeterroristit në Banjskë të Zveçanit vitin e kaluar ku mbeti i vrarë polici Afrim Bunjaku.
Dhe me një vendim të marrë të mërkurën, Qeveria këto prona ia kaloi Ministrisë së Punëve të Brendshme, përkatësisht Policisë së Kosovës.
Nënkoloneli në pension vlerëson se një vendim i tillë është i mirëseardhur për Policinë për shkak se do ta ndihmojë ta shtrijë sundimin e ligjit në atë pjesë të vendit.
“Policia në atë pjesë ka nevojë për objekte për lokale etj për t’u vendosur njësitë përkatëse të cilat funksionon në atë pjesë për arsye se ne e dijmë që objekti ku ka funksionuar deri më tash ka qenë i ngushtë jo funksional sa duhet etj”, tha nënkoloneli në pension, Refki Morina.
Sipas tij vendosja e policëve në vilën e Radoiçiqit është e mirëseardhur për shkak se e njëjta është e vendosur në një pikë strategjike për Policinë.
“Gjithë ato vila e ndërtesa që i ka bërë ai i ka bërë me qëllim të taktikës së veprimit të kontrabandave në atë pjesë veriore prandaj marrja në shfrytëzim është e mirëseardhur për Policinë e Kosovës dhe shfrytëzohet për nevoja e Policisë është vend strategjik ku nga aty pastaj me kamera etj mund të përcillen lëvizjet e ndonjë grupi kriminal që munden nga Serbia apo aty për aty të ngriten etj dhe është e mirëseardhur për Policinë”, tha ai.
Të duhur këtë veprim e cilëson edhe eksperti i sigurisë, Hajrullah Tërnava i cili thotë se kjo pasuri është krijuar në formë kriminale.
Andaj, ai thotë se pronat e tilla mund të përdoren nga zyrtarët policorë edhe kur ata nuk janë në krye të detyrës.
“Dikun duhet me pasë ndonjë stacion të Policisë e dikun objekte tjera që ndoshta edhe pranë stacionit të Policisë, policë që shkojnë është pak më larg duhet edhe dikush me pasë objekte që munden me pushu Policia mujnë me kalu natën e sidomos ata policë që ndërrohen aty çdo 8 orë që punojnë edhe dikush mundet edhe me banu se ka aty policë ndoshta të Gjilanit apo të Prizrenit”, tha Tërnava.
Këtë vendim e kanë mirëpritur edhe nga Drejtoria Rajonale e Policisë në Mitrovicën Veriore. /teve1.info/
