Të mërkurën prezantoi planin vjetor të policisë në kryeqytet.
Këtu, drejtori i përgjithshëm, Gazmend Hoxha, zbuloi format përmes të cilave po kryhet vepra e fajdeve në Kosovë.
Për njërën prej tyre, gishtin e drejtoi tek pronarët e auto-salloneve.
“Janë dy-tre forma që po kryhet fajdeja në Kosovë. Ne duhet të mbledhim informacion, janë dy-tre forma që po kryhet fajdeja në Kosovë. E para është kur fajdexhiu, së bashku me viktimën, shkojnë te noteri dhe noterizojnë marrëveshjet për fajde… 55:35 E dyta janë problemet me sallonet e kerreve, shitjeve dhe këtu në bazë të informacioneve që ne i kemi, janë të përfshirë në këtë muhabet. Kërkojmë prej të gjithë juve, prej komandantëve, policëve, të mblidhni sa më shumë informacione për çështjen e fajdeve”, tha Hoxha të mërkurën.
Gjatë ditës, ekipi i Tëvë1, u përpoq të marr një qëndrim nga Shoqata e Auto-Salloneve në vend.
Por nga kjo shoqatë, televizionit i thanë se nuk janë më aktiv.
Pas kësaj, Tëvë1 vizitoi edhe disa prej këtyre bizneseve që operojnë në vend.
Por asnjë prej tyre, nuk pranoi të flas rreth deklaratës së drejtorit të përgjithshëm të policisë.
E ish-shefi i hetimeve në Policinë e Kosovës, thotë se deklarata e Hoxhës, duhet ta vë në lëvizje prokurorinë.
“Kjo thënia e Drejtorit të Policisë duhet të materializohet me aktivitet, punë sistematike të hetimeve por edhe të Prokurorisë, Gjykatave por edhe Ministrisë përkatëse, dmth nuk është kjo punë veç e Policisë… Qytetarëve t’iu bëhet me dije që mos të marrin fajde ose kredite jashtë bankave por vetëm në sistemin bankar për arsye se mund të vijnë deri në forma të ndryshme të keqpërdorimit që anojnë kah aspekti i zyrtarizimit të keqpërdorimeve të tilla”, thotë Refki Moria.
Ndryshe, gjatë viteve të fundit, janë arrestuar disa pronarë të auto-salloneve në Kosovë, nën dyshimin për përfshirje në skema të fajdesë.
