Njësia Antikontrabandë e Doganës së Kosovës ka sekuestruar mbi 100 kilogramë substancë narkotike të llojit marihuanë, gjatë një aksioni të zhvilluar sot në terminalin doganor.
Burime të Tëvë1 bëjnë të ditur se njësitë doganore kishin marrë paraprakisht informacion se një autobus i nisur nga Shqipëria drejt Kosovës po transportonte drogë.
Sipas Prokurores Habibe Salihu, aksioni u zhvillua në orët e hershme të mëngjesit:
“Automjeti, në të cilin dyshohej se mund të kishte substanca narkotike, u ndalua dhe pas verifikimeve u konstatua se ai ishte i modifikuar për transport të paligjshëm të drogës. Ky aksion është zhvilluar në bashkëpunim me Policinë e Kosovës dhe Doganën e Kosovës, dhe është udhëhequr nga Prokuroria Speciale,” tha Sallahu.
Shefi i Njësisë Antidroga, Reshat Murseli, shtoi:
“Edhe ky rast është një dëshmi e bashkëpunimit ndërinstitucional dhe si rezultat kemi konfiskimin e kësaj sasie. Një person është arrestuar dhe po përballet me masat ligjore përkatëse.”
Ky aksion vjen si pjesë e përpjekjeve të vazhdueshme të institucioneve të drejtësisë për të luftuar kontrabandën dhe trafikun e drogës në vend.
