Prokuroria Themelore në Prishtinë ka thënë se bastisja e realizuar të mërkurën nga Policia e Kosovës , në disa lokacione ku janë sipas ministrit të Punëve të Brendshme, Xhelal Sveçla janë mbyllë objekte të strukturave paralele është bërë paautorizimin e prokurorit të shtetit.
Në komunikatën e Prokurorisë thuhet se nuk kanë pas kërkesë zyrtare me shkrim për këtë aksion.
“Prokuroria Themelore në Prishtinë me qëllim të transparencës dhe sqarimit të opinionit publik, njofton se lidhur me rastin e kryerjes së kontrolleve dhe bastisjeve në disa lokacione për shkak të dyshimit se ekzistojnë struktura paralele,prokurori i shtetit sqaron opinionin publik se nuk ka autorizuar kryerjen e kontrollit apo bastisjes në këto lokacione, për shkak se nuk ka pasur ndonjë kërkesë zyrtare me shkrim për kryerjen e këtij aksioni nga ana e institucioneve gjegjëse, për çka edhe nuk është ofruar kurrfarë prove para prokurorit të shtetit për tu krijuar dyshimi i bazuar se është duke u kryer ndonjë vepër penale që bie nën kompetencën e Prokurorisë Themelore në Prishtinë”, thuhet në komunikatë.
Sipas Prokurorisë nuk ka qenë e mundur të lëshohet autorizim pasi për rastin nuk janë respektuar procedurat e nevojshme.
“Prokurori i shtetit duke pasur parasysh faktin që me këtë rast nuk janë përfillur procedurat e nevojshme të përcaktuara decidivisht në Kodin e Procedurës Penale të Republikës së Kosovës, nuk ka mundur që në rastin konkret të lëshohet çfarëdo autorizimi. Prokurori i shtetit është i gatshëm dhe i përkushtuar në ndjekjen e veprave penale dhe kryerësve të tyre, gjithmonë duke u bazuar në legjislacionin në fuqi, si dhe duke u bazuar në parimin e barazisë dhe mos diskriminimit të gjithë qytetarëve të Republikës së Kosovës”, thuhet nga Prokuroria Themelore në Prishtinë.
Policia e Kosovës ka thënë se aksioni është zhvilluar në bashkëpunim dhe koordinim me institucionet kompetente
