Të hënën u njoftua se greva e punonjësve të administratës në të gjitha gjykatat dhe prokuroritë e vendit, e nisur nga 1 marsi, do të pezullohet.
Por kështu nuk u veprua një ditë më pas në Prokurorinë Themelore në Prishtinë.
Objekti i këtij institucioni ishte i mbushur me punëtorë grevistë që vazhdonin me kërkesat e njëjta.
Nga këshilli grevist i kësaj prokurorie thanë se zyrtarisht nuk janë njoftuar që ka marrëveshje.
“Aty thuhet se janë dakorduar për pezullimin e grevës por ne si Prokurori Themelore, si Këshill Grevist i kësaj prokurorie ende nuk jemi njoftuar zyrtarisht lidhur me marrëveshjen e arritur ose dakordimin. Ende nuk kemi marrë përgjigje nga Zyra e Kryeministrit, lidhur me kërkesat tona”, tha Valon Mehmeti, nënkryetar i Këshillit Grevist të Prokurorisë Themelore.
Tutje Mehmeti shton se kanë lëshuar pe nga kërkesat që kishin e momentalisht kanë vetëm një kërkesë.
“Nga disa kërkesa tona që kemi pas kemi ardhë në përfundim me një kërkesë shumë specifike si kusht për ndërprerjen e grevës. Ajo ka qenë një pagesë lineare, një pagesë shtesë prej 150 eurosh deri në aprovimin e ligjit”, tha ai.
Nga e gjithë kjo situatë, qytetarët po ankohen se nuk po mund t’i kryejnë punët e tyre.
“Unë jam ardhë këtu me nxjerr ni letër nën hetime që tri javë ditë jam tu u en domethënë poshtë e lartë po më enin veç grevë, grevë s’po kryejnë punë kurrgjë hiç. Që tri jav janë domethënë nëpër greva jam met edhe pa punë shkaku i një letrës me marrë nën hetime”, tha qytetari Diar Makolli.
Përveç Prokurorisë Themelore në Prishtinë, televizioni ka marrë vesh se greva nuk është ndërprerë as në Prokurorinë Themelore të Pejës. Megjithatë, Zyra për Informim e kësaj prokurorie nuk e ka konfirmuar këtë gjatë të martës.
Televizionit në pyetjet e bëra nuk i janë përgjigjur as Këshilli Prokurorial e Ministria e Drejtësisë.
Greva e punonjësve të administratës filloi më 1 mars në Gjykatën Themelore të Prishtinës për t’u shtrirë për një periudhë të shkurtë në tërë vendin.
Përveç pagesës lineare kërkesa ishin edhe përafrimi i pagave të administratës në raport me pagat e gjyqtarëve e prokurorëve, miratimi i ligjit për punëtorët e administratës së sistemit të drejtësisë, si dhe pagesat e shujtës ditore e udhëtimit.
Raporti i gazetarit Gojart Jashari.
