Prishtinë-Prokuroria Speciale e Republikës së Kosovës, po heton 1 mijë e 600 kontrata njëburimore. Këtë e ka bërë të ditur, zëvendëskryeprokurori i kësaj Prokurorie, Valdet Gashi, derisa po prezantonte raportin vjetor të punës së PSRK-së, në mbledhjen e 261-të e Këshillit Prokurorial të Kosovës (KPK).
Anëtari i KPK-së, Arian Gashi, pyeti se pse ka një disbalancë mes lëndëve të kryera te disa prokurorë, duke thënë se disa prej tyre kanë kryer vetëm gjysmën e lëndëve që kanë në punë, e disa prej tyre dyfishin e tyre, duke qenë se PSRK-së iu kanë shtuar 9 prokurorë të rinj.
Për këtë, zv/kryeprokurori Gashi u përgjigj duke thënë se prokurorët e rijn kanë filluar punën në qershor të vitit të kaluar dhe janë angazhuar me hetimin e kontratave njëburimore.
Sipas tij, po hetohen 1 mijë e 600 kontrata njëburimore për të cilat tha se nuk ka informacione dhe duhet të analizohen, për çka tha se janë aktivizuar dhe janë duke pritur informata nga Policia.
Ai ka thënë se këto raste kanë krijuar këtë disbalancë mes prokurorëve, raporton “Betimi për Drejtësi”.
Gashi bëri të ditur se Prokuroria Speciale, më 2024 ka bartur 1 mijë e 757 lëndë nga viti 2023, dhe janë pranuar 489 lëndë të reja. Ai tha se më 2024 janë zgjedhur 288 lëndë, apo 58.9 % e lëndëve të pranuara.
Gashi tha se më 2023 puna e kryerjes është më e lartë, por në 2024 janë ballafaquar me sfida, siç është ndryshimi i ligjit për PSRK-në, siç ka vendosur edhe disa pozita për zyrtarë që më herët kanë qenë në Themelore.
Ushtruesi i detyrës se Kryeprokurori të Shtetit, Besim Kelemendi, tha se në këtë raport mungojnë të dhëna për përqindjen e normës se kryer nga prokurorët. Ai shtoi se e përgëzon PSRK-në për punën, por foli për efikasitetin e prokurorëve të ri, për çka tha se mund të jetë më i mirë duke sugjeruar të mbahen diskutime me këta prokurorë.
Gashi tha se beson që prokurorët do të tregojnë efikasitet më 2025-ën.
Zv/kryeprokurori u pyet edhe nëse ka aktakuza për shpëlarje të parave, për të çka tha se ka aktakuza dhe aktgjykime dënuese, por aktualisht nuk janë në raport por mund të plotësohet. Ai foli edhe për ligjin për kompetencat e zgjeruara, ku tha se aplikohet në gjithë ato raste ku vlerësohet.
Në lidhje me pushimet e hetimeve në rastet kur të përfshirë janë ministra të Qeverisë aktuale, Gashi tha se për ta janë të parëndësishëm emrat, dhe se rastet trajtohen në mënyrë të paanshme, duke shtuar se kjo përgjigje është dhënë nga Kryeprokurori Blerim Isufaj pasi i është parashtruar pyetja në konferencën vjetore.
Me rekomandim që të plotësohet raporti brenda një jave me raportet plotësuese dhe punën e gjithë prokurorëve, me 10 vota për u aprovua Raporti i Punës se Prokurorisë Speciale. /BetimipërDrejtësi
