Përkundër që zyrtarisht kishin nisur hetimet ndaj tij, ish-kryetari i Lëvizjes Vetëvendosje në Mitrovicë, Faruk Mujka, në dhjetorin e vitit 2022, u zgjodh në pozitën e kryeshefit të ndërmarrjes “Ibër Lepenci”.
Rreth tre vite pas, ndaj Faruk Mujkës, dhe ish-drejtorit komunal të Mitrovicës, Hysen Muzliukaj, është ngritur një aktakuzë për keqpërdorim të detyrës zyrtare.
Prokuroria Speciale po i akuzon Mukën dhe Muzliukajn se i shkaktuan dëm Agjencisë Kosovare të Privatizimit, në vlerë rreth 125 mijë euro, kur vendosën ta shkëmbejnë një pronë komunale, në kohën kur Mujka mbante pozitën e nënkryetarit të komunës së Mitrovicës, kurse Muzliukaj pozitën e drejtorit për gjeodezi.
“Sipas aktakuzës, më 25.04.2021, të pandehurit, duke qenë në dijeni se Kuvendi i Komunës kishte marrë dy herë vendim për shpalljen me interes të posaçëm publik të një prone të paluajtshme, i paraqitën po këtij Kuvendi një Propozim-Vendim për këmbimin e të njëjtës prone, duke e paraqitur atë si pronë komunale, duke i shkaktuar dëm të konsiderueshëm prej 125,100.00 euro Agjencisë Kosovare të Privatizimit (AKP)”, kanë njoftuar nga prokuroria.
Mujka, gjithashtu po akuzohet për mosraportim ose raportim të rremë të pasurisë.
Monitoruesit e sistemit të drejtësisë, kanë kritika për mënyrën se si gjykatat dhe prokuroritë, i trajtojnë rastet e keqpërdorimeve të detyrës zyrtare.
“Kjo po ndodh për shkak se procesi hetimor nuk po zhvillohet si duhet nga policia dhe prokuroria e shtetit dhe provat që po deponohen në gjykata nuk po qëndrojnë ose nuk po janë prova të besueshme që gjyqtarët e Kosovës me i dënuar këta zyrtarë publikë. Mirëpo, faji mbetet edhe te gjykatat të cilat me apo pa qëllim kanë zvarritur proceset gjyqësore sidomos të profilit të lartë të politikanëve që kanë qenë të akuzuar për vepra penale të korrupsionit”, është shprehur Bugaqku.
“Prokuroria do të duhej të aktivizohej dhe të fillonte hetimet kundër çdo vendimi që është marrë e që bie në kundërshtim me ligje dhe kompetencat që ligji i autorizon të ndërmarrin ato institucione apo ajo zyre qeveritare. Kështu që fatkeqësisht edhe prokuroria është duke e neglizhuar apo edhe nga ana tjetër kam përshtypjen që edhe nuk e ka guximin që të inicioj hetimet sipas detyrës zyrtare sepse ligjin e obligon prokurorinë që në çdo rast në çdo situatë kur ka vepër penale sipas detyrës zyrtarë do të duhet të inicioheshin hetime”, ka thënë Nrecaj nga Instituti Clard.
Nën dyshimet për keqpërdorim të detyrës zyrtare, të hënën, kryetari i Mitrovicës, Bedri Hamza, e shkarkoi drejtorin për Kulturë, Rini dhe Sport, Fahri Jasharin.
Sipas Hamzës, Jashari dyshohet se e keqpërdori detyrën e tij kur i ndau rreth 6 mijë e 500 euro më shumë subvencion, një Organizate Joqeveritare.
