Prokuroria Speciale e Kosovës ka ngritur aktakuzë në Gjykatën Themelore në Prishtinë, ndaj të pandehurit me inicialet H.G., pasi që i njëjti dyshohet për veprën penale “Shpëlarje e parave”.
Prokuroria Speciale ka bërë të ditur se i pandehuri H.G., akuzohet se duke vepruar në bashkëkryerje edhe me persona tani për tani të paidentifikuar, në llogarinë bankare të kompanisë së tij me seli në Prishtinë, ka pranuar dhe ka poseduar shumën e të hollave prej 213,897.94 euro, me qëllimin që ato të vihen në qarkullim si të siguruara në mënyrë të ligjshme.
Gjithashtu, shumën prej 9,500.00 euro kishte arritur t’i tërheqë duke prezantuar fakte të rrejshme se gjoja i ka realizuar në mënyrë të ligjshme, edhe pse e ka ditur se pasuria e caktuar- mjetet e lartcekura janë fituar përmes aktivitetit kriminal të kryer përmes përdorimit të sistemit kompjuterik nga personi tani për tani i paidentifikuar.
“Në këtë mënyrë ka kryer veprën penale në bashkëkryerje edhe me të pandehurit tjerë të paidentifikuar ‘’Shpëlarja e parave’’ nga neni 302 lidhur me nenin 31 të Kodit nr. 06/L-074 Penal të Republikës së Kosovës (KPRK), lidhur me nenin 56 (paragrafi 1) të Ligjit nr. 05/L-096 për Parandalimin e Pastrimit të Parave dhe Luftimin e Financimit të Terrorizmit”, thuhet në njoftim.
Tutje në njoftim thuhet se Prokuroria pas pranimit të informatave lidhur me kryerjen e kësaj vepre penale, kishte arritur që përmes urdhrit të përkohshëm për ngrirje të sekuestronte përkohësisht mjetet të cilën shumë me paraqitjen e Aktakuzës, PSRK i ka propozuar Gjykatës që ta konfiskojë si dobi e fituar nga vepra penale respektivisht që kanë rrjedhur nga aktiviteti kriminal i të pandehurit, me urdhër që e njëjta shumë të transferohet tek pala e dëmtuar./teve1.info/
