Instituti i Mjekësisë Ligjore është përfshire sot në mëngjes nga zjarri, ku janë djegur dy zyre dhe nuk është raportuar për persona të lënduar.
Nga Prokuroria Themelore në Prishtinë për teve1.info kanë thënë se Prokurori i Shtetit me të dalë në vendin e ngjarjes ka lëshuar disa autorizime për kryerjen e ekzaminimeve.
“Ju njoftojmë se me të pranuar informatën nga Policia e Kosovës lidhur me incidentin e zjarrit në Institutin e Mjekësisë Ligjore në Prishtinë, Prokurori i Shtetit ka dalë në vendin e ngjarjes bashkë me të gjitha njësitë relevante për t’i ndërmarrë të gjitha veprimet e nevojshme hetimore, me qëllim të sqarimit të shkaqeve të këtij incidenti. Prokurori i Shtetit ka lëshuar disa autorizime për kryerjen e ekzaminimeve nga vendi i ngjarjes dhe nga të gjeturat e tyre eventualisht në rast të paraqitjes së elementeve të veprës penale, do t’i ndërmerr veprimet e mëtejme konform dispozitave të KPPRK-së”, ka deklaruar zëdhënësja e kësaj prokurorie, Laureta Ulaj.
Ajo shtoi se Prokuroria në koordinim me Policinë dhe IML-në dhe institucionet e tjera relevante janë duke vazhduar ndërmarrjen e veprimeve hetimore.
“Prokuroria në koordinim të plotë me Policinë e Kosovës, IML-në dhe institucionet e tjera relevante janë duke vazhduar me ndërmarrjen e veprimeve hetimore deri në sqarimin e plotë të rastit në fjalë”, tha Ulaj.
Ndryshe, sot rreth orës 08:00, në Institutin e Mjekësisë Ligjore në Prishtinë, dy zyra janë përfshirë nga zjarri. Policia menjëherë ka dalë në vendin e ngjarjes, po ashtu edhe zjarrfikësit të cilët kanë lokalizuar zjarrin.
Ndërkaq rreth rastit, detaje kanë dhënë edhe nga Brigada e Zjarrfikësve të Prishtinës. Zëvendëskomandanti i Brigadës, Abdusamet Shkodra bën të ditur se zjarri në IML është lokalizuar dhe është nën kontroll, ndërsa thuhet se nuk ka pasur të lënduar.
Haxhiu: S’ka dëmtim të mbetjeve mortore, arkivës së IML-së dhe mostrave
