Prokuroria Themelore në Gjilan, ka kërkuar caktimin e masës së paraburgimit nga Gjykata Themelore e Gjilanit, ndaj një personi të dyshuar për kultivim dhe posedim të narkotikëve.
“Sipas kërkesës, ekziston dyshimi i bazuar se, i pandehuri S.J., më 14 Gusht 2024, në komunën e Kamenicës, me dashje, pa autorizim dhe me qëllim të prodhimit të narkotikëve, ka kultivuar bimën e kanabisit, në atë mënyrë që gjatë realizimit të urdhërkontrollit, nga ana e zyrtarëve policor në oborrin e shtëpisë së tij janë gjetur 8 bimë të llojit ‘’Canabis Sativa’’, me gjatësi prej 45 cm – 1.30m, në katër vazo të plastikës”,thuhet në kërkesën e Prokurorisë.
Po ashtu, Prokuroria ka bërë të ditur se të dyshuarit i është gjetur dhe sekuestruar edhe substancë narkotike e llojit “Marihuanë”, në peshë prej 1.00gr.
Me këto veprime ai ka kryer veprat penale ‘’Kultivimi i bimës së hashashit, shkurres së kokainës ose bimëve të kanabisit’’ dhe ‘’Posedimi i paautorizuar i narkotikëve, substancave psikotrope ose analoge’’./teve1.info/
