Prokuroria Themelore në Gjakovë ka kërkuar nga Gjykata Themelore caktimin e paraburgimit 30-ditor për A.I., i dyshuar për vrasjen e dyfishtë në fshatin Golluboc të Malishevës.
Sipas prokurorisë, i dyshuari, i cili është dhëndër i familjes së viktimave, ka shtënë me pistoletë në drejtim të dy vëllezërve D.M. dhe N.M., që ndodheshin jashtë shtëpisë së tyre pas ceremonisë së varrimit të babait të bashkëshortes së tij.
Të dy viktimat vdiqën nga plagët e marra.
Pas ngjarjes, i dyshuari u arratis, ndërsa viktimat u dërguan në QKMF Kijevë pa shenja jete.
Ai u arrestua të nesërmen, më 7 nëntor, dhe aktualisht ndodhet nën masën e ndalimit 48-orësh.
Prokuroria e ka ngritur akuzën për “vrasje të rëndë” dhe pret vendimin e gjykatës për paraburgim.
Sipas kërkesës së Prokurorisë, “ndër të tjera ceket se ekziston dyshimi i bazuar se i pandehuri me inicialet A.I., më datë 06.11.2025 rreth orës 11:25 min, në fshatin Golluboc – Komuna e Malishevës, me dashje ka privuar nga jeta tani të ndjerët D.M., dhe N.M., që të dy nga fshati Golluboc – Komuna e Malishevës, në atë mënyrë që i pandehuri si dhëndër i familjes së tani të ndjerëve D.M., dhe N.M., shkon në vendin e cekur më lartë, tek shtëpia e të ndjerëve për t’a marr bashkëshorten I.M., dhe fëmijët, e cila ndodhej tek familja e saj me rastin e varrimit të babait, e ku për këtë ceremoni varrimi kishin ardhur edhe tani të ndjerët D.M., dhe N.M., e si shkak i problemeve dhe dhunës së ushtruar ndaj motrës së tani të ndjerëve, gjatë largimit nga shtëpia e këtyre të fundit, në rrugë fillon një fjalosje në mes tyre e në momentin kur dëshmitarja I.M., përshëndetet me nënën e saj e del jashtë dyerve të oborrit në rrugë vëren të pandehurin – bashkëshortin e saj duke shtënë disa herë me armë të llojit Pistoletë TT në drejtim të vëllait të saj tani të ndjerit D.M., e më pas shtënë po ashtu disa herë në drejtim të vëllait tjetër të saj tani të ndjerë N.M., të ndjerët D.M., dhe N.M., nga plagët e marra në pjesë vitale të trupit mbesin të shtrire përtokë, i pandehuri hedh pistoletën dhe largohet në drejtim të panjohur, ndërsa viktimat dërgohen në QKMF Kijevë pa shenja jete, të nesërmen i pandehuri arrestohet”. /teve1.info/
