“Meqenëse partia më e re opozitare, prokuroria e shtetit, nuk do të ketë deputetë në legjistlaturën e nëntë, le të shkojë në shtëpi. Me 10 shkurt, s’ka pse del në punë, se s’janë tu bo punë”, ka deklaruar kryeministri, Albin Kurti.
Kjo nuk është hera e parë që kryeministri i tanishëm që po synon mandatin e tretë si shef i ekzekutivit, përdor gjuhë të tillë ndaj sistemit të drejtësisë.
Mirëpo, kjo gjuhë e përdorur në fushata zgjedhore vlerësohet si e papranueshme.
“Pavarësisht motiveve që e shtyjnë qoftë kryeministrin me theks të veçantë, por edhe eksponentët e tjerë për të bërë sulme të tilla e etiketime të tilla, në bindjen time janë të papranueshme, dhe si të tilla duhet të ndalen, për faktin se e minojnë besimin e publikut në drejtësi në përgjithësi e ndaj sistemit prokurorial si organ i pavarur për hetimin e veprave penale, në veçanti. Prandaj, duhet të ndalen sa më parë, sepse nuk shkojnë në funksion të rritjes së besimit, por në të kundërtën. E minojnë besimin e publikut ndaj institucioneve ligjzbatuese”, ka thënë avokati Ardian Bajraktari.
Përkundrazi, fokusi në fushata konsiderohet se do duhej të ishte fuqizimi i sistemit të drejtësisë.
“Kjo është vetëm retorikë elektorale, sepse fundja askush nuk është mbi ligjin. Retorika elektorale dhe sulmet kundrejt një sistemi, i cili sado i brishtë të jetë, prapë se prapë do duhej që institucionet, respektivisht Qeveria, që ta mbështeste dhe fuqizonte sundimin e rendit dhe ligjit”, ka deklaruar Anton Ndrecaj nga Instituti CLARD.
Karshi këtyre deklarimeve, Këshilli Prokurorial ka zgjedhur të heshtë.
