Me radhë u sollën në Stacionin Policor të Pejës.
Brenda tij, komisionerët nga Deçani e Juniku u intervistuan për disa orë.
Krejt kjo pas një aksioni të Prokurorisë Themelore të Pejës, në lidhje me manipulimin e votave të kandidatëve për deputetë në zgjedhjet e 28 dhjetorit.
Para gazetarëve, doli zëdhënësi i Policisë së Kosovës për Rajonin e Pejës.
Fadil Gashi, dha detajet për atë që po ndodhte brenda këtij stacioni.
“Sektori i hetimeve pranë drejtorisë rajonale, pasi ka pranuar udhëzimin që të fillojnë hetimet në rastin në dy komuna, Deçan dhe Junik, sot kanë filluar intervistimet ende po vazhdojnë. Në bashkëpunim dhe koordinim me prokurorin e shtetit, po vazhdojnë hetimet lidhur me rastin e votave”, ka thënë Gashi.
Detaje rreth aksionit të mërkurën për Tëvë1, dha edhe vet Prokuroria Themelore e Pejës.
“Kryeprokurorja ka lëshuar autorizim për hetimet rajonale të Policisë së Pejës, për të grumbulluar vota rreth procesit të votimit për numërimin e votave të kandidatëve për deputet. Dhe, njëkohësisht ka caktuar disa prokuror për këtë çështje, me ç’rast prokurorët e shtetit kanë autorizuar hetimet rajonale për intervistimin e disa personave, përfshirë komunën e Junikut dhe Deçanit, ku sot janë intervistuar 30 persona komisionarë në cilësinë e të dyshuarve ndërkaq në ditët në vijim do të ftohen edhe persona të tjerë”, ka njoftuar Nikçi
Sipas zëdhënësit të kësaj prokurorie, të mërkurën nuk kishte persona të ndaluar.
Por, Nikçi shton se intervistimet e komisionerëve nuk do të ndalen me Deçanin e Junikun.
“Në ditët në vijim, do të intervistohen edhe komuna të tjera, ku ka më shumë diskrepancë të votave. Deri në këtë moment sa jemi duke biseduar, ende nuk ka persona të ndaluar, janë duke u proceduar si persona të dyshimt, për veprat penale që iu bije në barrë”, u shpreh tutje Nikçi
Tëvë1 përmes burimeve ka mësuar se përveç komisionarëve, intervistim do të bëhet edhe ndaj kryesuesve të Qendrave Komunale të Numërimit në Pejë.
