Një fëmijë dy vjeçar ka humbur jetën ditën e diel në Gjilan, në rrethana ende të pasqaruara.
Viktima ishte dërguar pa shenja jete në Spitalin Rajonal të Gjilanit, ku nga mjeki kujdestar ishte konstatuar vdekja e tij.
Ndërsa, lidhur me shkaqet e vdekjes është duke u marrë prokuroria.
Për teve1.info zëdhënësja e Prokurorisë Themelore në Gjilan, Liridona Xheladini, ka konfirmuar se trupi i pajetë është dërguar në Institutin e Mjekësisë Ligjore (IML).
“Ju njoftojmë se për këtë rast me urdhër të prokurorit të shtetit trupi i pa jetë është dërguar në Institutin e Mjekësisë Ligjore, në mënyrë që të përcaktohen rrethanat e vdekjes”, deklaroi ajo.
Ndërkaq, drejtori i Spitalit të Gjilanit, Arsim Emini, ka deklaruar për media se fëmija nuk ka pasur ndonjë traumë apo shenjë të dhunës fizike, mirëpo sipas mjekut kujdestar është cilësuar si vdekje e dyshimtë.
Ndërkaq, në raportin ditor të Policisë së Kosovës thuhet se rasti është duke u hetuar.
“Është raportuar se në spitalin rajonal është dërguar pa shenja jete viktima mashkull kosovar. Vdekjen e tij e ka konstatuar mjeku kujdestar, ndërsa me vendim të prokurorit trupi i pajetë është dërguar në IML për obduksion. Rasti nën hetime”, thuhet në njoftim./teve1.info/
