Prokurori i Shtetit ka bërë të ditur se nuk kanë evidentuar asnjë rast nga veprat penale kundër të drejtave të votimit.
Sipas Prokurorisë, procesi i votimit në katër komunat veriore për kryetar të Komunës në Mitrovicën e Veriut, Leposaviq, Sveçan dhe Zubin Potok ka kaluar pa asnjë rast nga veprat penale kundër të drejtave të votimit.
Në njoftimin për media thuhet se Prokurori i Shteti do të vazhdojë të mbikëqyrë procesin e numërimit të votave deri në përfundim të procesit.
“Prokurori i Shtetit njofton opinionin publik se gjatë gjithë ditës ka mbikëqyrë procesin e jashtëzakonshëm zgjedhor në katër komunat e Republikës së Kosovës, për kryetar të Komunës në Mitrovicën Veriore, Leposaviq, Zveçan dhe Zubin Potok, ndërsa të parakohshme për dy kuvendet komunale në Zveçan dhe Leposaviq. Pas përfundimit të procesit të votimit dhe mbylljes së vendvotimeve ju njoftojmë se nuk kemi të evidentuar asnjë rast nga veprat penale kundër të drejtave të votimit. Prokurori i Shtetit, do të vazhdoj të mbikëqyr procesin e numërimit të votave deri në përfundimin e këtij procesi”, thuhet në njoftim.
Gjithashtu edhe Komisioni Qendror i Zgjedhjeve tha se procesi zgjedhor është zhvilluar pa asnjë problem.
Mbi 1.500 qytetarë votuan për zgjedhjet e jashtëzakonshme lokale për zgjedhjen e kryetarëve të rinj në Mitrovicë të Veriut, Leposaviq, Zubin Potok dhe Zveçan. /teve1.info/
