Ushtruesi i detyrës i kryeprokurorit të shtetit, Besim Kelmendi, bëri të ditur se Institucioni i Prokurorit të Shtetit, gjatë vitit 2023 ka pranuar 52 mijë e 93 raste.
Gjatës fjalës së tij në konferencën vjetore, Kelmendi po ashtu tha se nga këto raste, Prokurori i Shtetit ka përfunduar mbi 41 mijë.
“Institucioni i Prokurorit të shtetit ka punuar ose ka pranuar në punë 52 mijë e 93 raste nga të cilat ka përfunduar 41 mijë e 973. Bazuar në raportet kredibile ndërkombëtare, në vitin 2023, Kosova ka shënuar rezultate të konsiderueshme në fushën e sundimit të ligjit. Andaj këto suksese janë argumenti më i mirë se edhe zyrtarët që vazhdimisht që kritikojnë punën e Prokurorit të Shtetit, i pranojnë rezultatet dhe sukseset e punës tonë”, deklaroi Kelmendi.
Tutje, Kelmendi potencoi se për herë të parë kanë shënuar sukses në fushën e ngrirjes, sekuestrimit dhe konfiskimit.
Me ç’rast, ai tregoi se në vitin paraprak, kanë sekuestruar, ngrirë dhe konfiskuar pasuri në vlerë 111 milionë euro.
“Për herë të parë kemi shënuar sukses edhe në fushën e ngrirjes, sekuestrimit dhe konfiskimit. Vlera e pasurisë së ngrirë dhe sekuestruar është afër 88 milionë euro. Ndërsa vlera përfundimtare të aseteve të konfiskuara është 24 milionë euro, thënë ndryshe në përgjithësi sekuestrim ngrirje konfiskim në vitin e kaluar mbi 111 milionë euro”, u shpreh Kelmendi.
Ndër të tjerash, Kelmendi përmendi edhe punën që është bërë në vitin e kaluar në rastet e korrupsionit dhe krimit ekonomik, raporton teve1.info.
“Një rëndësi të veçantë është puna edhe rreth rasteve të korrupsionit dhe krimit ekonomik. Prokurori i shtetit 2023 ka pranuar në punë 1182 raste me 2192 persona dhe nga këto ka përfunduar 920 raste me 1622 persona, ndërsa të krimet ekonomike kemi arritur një sukses duke përfunduar 446 raste nga 583 persona”, theksoi ai./teve1.info/.
