Projektligji për ndryshimin dhe plotësimin e ligjeve që kanë të bëjnë me racionalizimin dhe vendosjen e vijave llogaridhënëse të agjencive ekzekutive, është bartur për seancën e radhës, raporton teve1.info
Kryetari i Kuvendit Glauk Konjufca tha se meqë Grupet Parlamentare të Opozitës kanë marrë vendim që ta bojkotojnë votimin, nuk ka nevojë të përsëritet votimi, megjithëse ka të drejtë të përsëritet tri herë radhazi.
“Rezultati dihet edhe nëse vihet sërish në votim. Deputetët e opozitës nuk do të votojnë edhe nëse e hedhim sërish kështu që kjo pikë i bartet seancës së rregullt kurdo që do të mbahet ajo”, u shpreh Konjufca.
Për seancat e radhës janë bartur po ashtu pikat: Votimi i Raportit vjetor të Komisionit të Pavarur të Mediave për vitin 2021, Votimi i Raportit vjetor të Autoritetit Rregullativ të Komunikimeve Elektronike dhe Postare për vitin 2021 dhe Votimi i Raportit me rekomandime nga mbikëqyrja e zbatimit të Ligjit nr.05/L-003 për Mbikëqyrjen Elektronike të Personave të Cilëve u Kufizohet Lëvizja me Vendim të Gjykatës, pasi që në votim morën pjesë 49 deputetë, të pamjaftueshëm për të krijuar kuorumin e votimit.
