Projekti për ngrohtore solare në kryeqytet pritet të ndryshojë cilësinë e ajrit, krahas kësaj pritet ta zvogëloj edhe varësinë nga qymyri.
Ndotja e ajrit në Prishtinë, përherë ka qenë e lartë.
Dukshëm është vërejtur gjatë sezonit të dimrit, për shkak të nevojës më të madhe për prodhim të energjisë elektrike, që përdoret për ngrohje.
Për të reduktuar këtë, si dhe zgjidhur problemet të tjera me energji, është paraparë një projekt për ngrohtore solare në kryeqytet.
Sipas ambientalistit, Sami Makolli, marrëveshja mes Termokosit dhe Ministrisë së Financave është ndryshe prej projekteve paraprake.
“Pritet të ketë ndikim më serioz në mjedisin e kryeqytetit, e sidomos në cilësinë e ajrit pasi projekti parasheh që të kyqen 12 mijë familje që shumica prej tyre përdorin dru dhe thëngjill për ngrohje. Si projekt ka impact minimal, mos të them aspak në mjedis, është mjaft specifik për faktin që parasheh ngrohjen e ujit verës, të funksionojë si një lloj termosi gjigant”, tha ambientalisti, Aami Makolli.
Ndërkaq, ekonomisti Jakup Bellaqa rendit përfitimet nga ky projekt.
“Duhet theksuar se kjo nxit edhe rritjen ekonomike dhe përkrahjen e qëndrueshme mjedisore. Gjtihashtu mundëson që të zvogëlohet konsumi i energjisë elektrike dhe të zvogëlohet varësia nga qymyri gjithashtu. Këto janë benefitet nga ky projekt”, u shpreh ekonomisti, Jakup Bellaqa.
Vlera totale e këtij projekti të ngrohjes solare është mbi 80 milionë euro. Ky projekt e rrit prodhimin e energjisë termike dhe u mundëson edhe 38 mijë qytetarëve të kyçen në rrjetin e Termokosit.
