Policia e Kosovës ka njoftuar se procesi zgjedhor i mbajtur sot në gjithë territorin e Republikës së Kosovës ka kaluar i qetë dhe pa incidente serioze që do të rrezikonin mbarëvajtjen e tij.
Sipas vlerësimeve zyrtare, zbatimi i planit operacional të paraparë për këtë ditë ka rezultuar i suksesshëm, duke garantuar rendin, sigurinë dhe qetësinë publike para, gjatë dhe pas votimit.
Në njoftimin zyrtar thuhet se falë angazhimit të zyrtarëve policorë dhe bashkëpunimit ndërinstitucional, janë shmangur situatat e rrezikshme dhe është ruajtur integriteti i procesit zgjedhor.
“Një ndër objektivat kryesore të këtij plani ishte identifikimi dhe procedimi i çdo veprimi që cenon të drejtën e votimit.Gjatë ditës, janë iniciuar dy raste për “Cenim të fshehtësisë së votimit” – një në fshatin Bare (Mitrovicë e Jugut) dhe një tjetër në Kllokot (nën juridiksionin e DRP Gjilan). Ndërkohë, në lidhje me dyshimet për “fotografim të votës”, janë evidentuar njëmbëdhjetë raste, të cilat janë trajtuar si shënime zyrtare me autorizim të prokurorëve kompetentë”, thuhet në njoftimin e policisë.
Të gjithë personat e shoqëruar për këto raste janë liruar pas intervistimit, në procedurë të rregullt.
“Lidhur me një incident të ndodhur në Komoran, ku u raportua për të shtëna me armë zjarri dhe dëmtim të një veture, Policia ka sqaruar se rasti nuk ka lidhje me zgjedhjet. Hetimet për këtë rast po vazhdojnë nën autorizimin e Prokurorisë përkatëse”, tha tutje policia.
Po ashtu, Policia ka trajtuar edhe rreth dhjetë informacione të natyrave të ndryshme që lidhen me zgjedhjet, por pas vlerësimeve me prokurorët kompetentë, është konstatuar se nuk përmbanin elemente penale dhe janë regjistruar vetëm si informacione.
“Policia e Kosovës falënderon të gjitha institucionet, qytetarët dhe mediat për bashkëpunimin dhe kulturën demokratike të treguar gjatë këtij procesi, duke e vlerësuar lartë rolin e secilit në garantimin e një procesi të rregullt zgjedhor”, tha ndër të tjera PK-ja./teve1.info/
