Në rrugën drejt anëtarësimit në bllokun evropian, Kosova synon edhe integrimin në mekanizma të tjerë ndërkombëtarë. Mirëpo procesin e integrimit të mëtutjeshëm, njohësit e rrethanave politike e konsiderojnë të vështirë, nisur nga masat ndëshkuese që BE-ja i ka vendosur Kosovës.
Vlerësohet se masat ndëshkuese nga BE-ja mund ta stagnojnë anëtarësimin
Kosova aktualisht është në proces të anëtarësimit në Këshillin e Evropës.
Por, blloku evropian ndaj shtetit kosovar, ka vendosur disa masa ndëshkuese, si shkak i mos de-përshkallëzim të situatës në komunat e veriut të Kosovës.
Këto masa shihen si penguese të integrimit të Kosovës në rrugën evropiane.
Sipas hulumtuesit në Grupin për Studime Juridike dhe Politike, Arbër Fetahu, masat mund të stërzgjatin pranimin e Kosovës në Këshillin e Evropës.
Ndërsa politologu, Fidan Ukaj thotë se tashmë rruga drejt përparimit në proceset integruese është bllokuar dhe gjithçka do të varet si do të ecë dialogu i Brukselit.
Televizioni ka tentuar të marrë përgjigje nga Ministria e Punëve të Jashtme, për punën që po bëhet për anëtarësim në mekanizmat evropianë, mirëpo deri në publikim e kësaj kronike nuk ka marrë përgjigje.
Kosova në maj të vitit të kaluar kishte aplikuar për tu bërë anëtarja më e re e Këshillit të Evropës, teksa në dhjetor të po të njëjtit vit aplikoi për anëtarësim në Bashkimin Evropian.
