Nga Mitrovica e Veriut u adresua kërkesa e radhës. Kjo komunë, po kërkon t’I bashkohet Asociacionit të Komunave të Kosovës.
E menjëhershme ishte përgjigja nga ky institucion, i cili tregoi për procedurat që duhet ndjekur për t’u bërë pjesë e AKK-së.
“Në bazë të statutit të Asociacionit, Kuvendi Komunal i Mitrovicës së Veriut duhet të marrë vendim që dëshiron të bëhet pjesë e Asociacionit, dhe vendimi shkon pastaj për shqyrtim të ligjshmërisë në institucionet qendrore, e më pas rikthehet tek në. Në fund, Kuvendi i Asociacionit e merr vendimin”, ka thënë Ibrahimi për Tëvë 1.
E kjo nuk ishte kërkesa e vetme nga kryetarët e rinj.
Komunat nën udhëheqjen e shqiptarëve, kërkuan nga ZRRE dhe KOSTT që edhe energjia elektrike e shpenzuar nga institucionet publike atje, të bien në kompetencën e nivelit lokal.
Nga ZRRE thanë për Tëvë1 se janë në shqyrtim të kësaj kërkese.
“Zyra e Rregullatorit për Energji është në proces të shqyrtimit të kësaj kërkese dhe është duke i ndërmarrë të gjitha veprimet e duhura ligjore që janë nën kompetencën e ZRRE-së”, thuhet nga ZRRE
E njohësi i energjetikës, Vezir Rexhepi, konsideron se janë disa procedura për ridefinim.
Komuna e Mitrovicës së Veriut, po ashtu kërkoi auditim për dy vitet paraprake, proces për të cilin Institucioni i Auditorit të Përgjithshëm nuk ishte i qasshëm të tregonte nëse do të mirrej përsipër të kryhej.
