Ka më shumë se dy javë që komuna e Mitrovicës së Veriut ka bërë kërkesë për anëtarësim në Asociacionin e Komunave të Kosovës.
E kjo komunë të martën mori përgjigjje pozitive.
Ndonëse Ministria e Administrimit të Pushtetit Lokal miratoi kërkesën e kësaj komune për anëtarësim, Asociacioni pritet ta shqyrtoi ditëve në vijim.
Drejtori i AKK-së, Sazan Ibrahimi thotë se çdo komunë është e mirëseardhur.
“Neve veçse e kemi proceduar këtë në organet e Asociacionit të Komunave të Kosovës dhe tash do të veprojmë konform statutit të AKK-së…Çdo komunë angazhohet që të shkëmbejë përvoja të mira me komunat anëtare të AKK-së që të ngrijë kapacitete kjo është misioni ynë. Dmth këto të mira që dalin nga angazhimi i AKK-së, janë të mirëseardhura për çdo komunë në Republikës së Kosovës”, deklaroi Ibrahimi.
Nisur nga fakti se mund të ketë zgjedhje të reja në vjeshtë në komunat veriore, profesori i shkencave politike, Nexhmedin Spahiu thotë se është nën juridiksionin e kryetarit të ri, të qëndroi apo të dal nga ky asociacion.
“Është e natyrshme që komuna veriore të anëtarësohet në Asociacionin e Komunave të Kosovës. Ky është një vendim i lirë, kryetari i ri dhe kuvendi i ri mundet me u tërheq e me u anëtarësu më një asociacion tjetër. Kjo nuk ka asgjë të keqe, në anën tjetër nuk është ndonjë vendim nga i cili qytetarët presin”, vlerësoi Spahiu.
Kuvendi Komunal i Mitrovicës së Veriut mori vendim më 30 qershor që t’i nisë procedurat për anëtarësim në Asociacionin e Komunave të Kosovës.
