Punuan për një kohë të gjatë për këtë hulumtim.
E punën e bërë bashkërisht mes shqiptarëve e serbëve po e shpalosin para publikut.
Organizata “AKTIV” nga Mitrovica e Veriut se bashku me Qendrën për Demokraci dhe Edukim Lugina, kanë publikuar një hulumtim për pozitën e komuniteteve në Kosovë dhe në Serbi.
Të gjeturat e këtyre dy organizatave jo qeveritare tregojnë se komunitetet nga të dyja vendet përballen me sfida te ndryshme që kryesisht lidhen me mirëqenien ekonomike.
Koordinatori i Qendrës për Demokraci, Agon Islami, thotë se të rinjtë nga Lugina e Preshevës janë duke u larguar gjithnjë e më shumë për shkak të mungesës së perspektivës.
Me të njëjtat probleme sipas raportit po ballafaqohen edhe të rinjtë serb nga Kosova.
“Komuniteti serb në Kosovë ballafaqohet më një situatë të vështirë ekonomike dhe për këtë arsye shumë të rinj kanë vendosur të largohen. Gjithashtu raporti tregon se disa nga qytetarët serb nuk ndihen të sigurte, për shkak të krizave që kanë ndodhur gjatë vitit të kaluar. Prandaj mendoj se këto çështje duhet të adresohen seriozisht nga institucionet qendrore”, tha Miodrag Miliçeviq, drejtor Ekzekutiv i Organizatës “Aktiv”.
Në raport mes tjerash përmendet edhe çështja e dialogut mes Kosovës dhe Serbisë.
Shqiptarët mendojnë se liderët politik nga Lugina duhet të përfshihen në negociata.
Megjithatë, në këtë fazë duket e vështirë përfshirja e tyre në dialog me Serbinë.
“Korniza e dialogut është e njëjta ajo e vitit 2013-të dhe aty nuk përfshihen shqiptarët nga Lugina e Preshevës, dhe mendoi se kjo nuk do të ndryshojë as në këtë fazë. Pra raporti tregon qartë se shqiptarët në jug të Serbisë po ballafaqohen me shumë sfida, ata duhet të kenë përkrahje më të madhe nga niveli qendror”, tha Miliçeviq.
Autorët e këtij raporti shpresojnë se në të ardhmen e afërt do të krijohen kushte më të mira për komunitetet si në Kosovë ashtu dhe në Serbi.
Kronika e gazetarit Shpat Blakçori.