Gjatë qëndrimit në Londër, në kuadër të Procesit të Berlinit, kryeministri në detyrë Albin Kurti zhvilloi një takim me ministrin francez të deleguar për Evropën, Benjamin Haddad.
Në këtë takim, Kurti kërkoi që Franca ta mbështesë Kosovën në procesin e marrjes së statusit të vendit kandidat për Bashkimin Evropian.
Megjithatë, ish-deputeti i Kuvendit të Kosovës, Xhavit Haliti, vlerëson se qeveria duhet të forcojë marrëdhëniet me të gjitha shtetet e BE-së, duke përmbushur obligimet që burojnë nga ky proces.
“Është shumë e rëndësishme që t’i ruajmë marrëdhëniet e ngushta jo vetëm me Francën, por me të gjitha shtetet e Bashkimit Evropian. Problemi është që Kurti nuk mund ta përçajë Bashkimin Evropian pa i përmbushur obligimet e veta. Detyrat nuk ia ka caktuar Franca, por ia ka caktuar BE-ja”, tha Haliti.
Në anën tjetër, profesori i marrëdhënieve ndërkombëtare, Valon Murtezaj, e sheh si të rëndësishëm takimin mes Kurtit dhe ministrit francez, duke theksuar rolin që Franca luan brenda Bashkimit Evropian.
Sipas tij, Kosova pritet ta fitojë statusin e vendit kandidat në të ardhmen, por se ka ende shumë punë në këtë drejtim.
“Takimi i Kurtit me ministrin francez të deleguar për Evropën është i rëndësishëm. Statusi i Kosovës si vend kandidat do të vijë, por jo domosdoshmërisht tani, për shumë arsye. Në disa raste edhe vet Kosova i ka vonuar proceset me problemet e brendshme, veçanërisht këtë vit, kur ende nuk janë formuar institucionet e reja. Megjithatë, perspektiva e Kosovës si shtet evropian mbetet e pranishme, njësoj si për vendet e tjera të Ballkanit Perëndimor”, shprehet Murtezaj.
Kosova aplikoi për anëtarësim në Bashkimin Evropian më 15 dhjetor 2022, por kërkesa ende nuk është shqyrtuar.
Komisionarja e BE-së për Zgjerim, Marta Kos, ka deklaruar se normalizimi i marrëdhënieve me Serbinë është parakusht për marrjen e statusit të kandidatit dhe për nisjen e procesit të anëtarësimit në BE.
