Nga gjashtë tavolina të numërimit, vetëm tri janë gati për të filluar numërimin e votave në Qendrën e Numërimit në Kaçanik.
Tri të tjera, kanë probleme me sinjal, nuk kanë llap-top dhe kamerat nga Komisioni Qendror Zgjedhor janë jashtë funksionit.
Krejt këto telashe kanë bërë që numërimi të filloj me vonesë.
Menaxheri i kësaj qendre, Artan Mezraja thotë se deri në mesditë nuk është numëruar asnjë kuti.
Probleme me sistemin elektronik kanë hasur edhe komisionarët e komunës së Hanit të Elezit.
Nga e mërkura kur ka filluar numërimi, sistemi ka rënë disa herë.
Megjithatë, anëtari i KKZ-së, Bilall Bushi tha se kanë arritur ti numërojnë më shumë se gjysmën e kutive.
Gjatë së enjtes, për problemet në krejt komunat e Kosovës foli edhe kryetari i KQZ-së, Kreshnik Radoniqi.
Tutje Radoniqi tha se dyshojnë që ka pasur ndërhyrje në webfaqe të këtij institucioni.
Shefi i KQZ-së tha që për numërimin e votave e kanë edhe një plan B.
Përveç komunës së Hanit të Elezit dhe Kaçanikut, probleme teknike ka edhe komuna e Prishtinës.
