Rrugën e njëjtë për tek Kalaja e Prizrenit e bëri për 30 ditë më radhë.
E kjo, me të vetmin qëllim.
Çdo ditë në kohën e iftarit, Varis Hashimi, vendosi dy fishekzjarre në afërsi të topit të vjetër.
Krejt kjo, për t’i lajmëruar prizrenasit për kohën e iftarit.
“Është viti i dhjetë radhas që e praktikoj këtë punë. Projekti ka për qëllim me jetësua traditën e ‘topit të ramazanit’ që ka filluar prej fundit të shekullit të XIX gjatë periudhës së ish – perandorisë Osmane. Kështu që Këshilli i Bashkësisë Islame e ka marrë përsipër këtë projekt e unë e praktikojë këtë”, tregon aktivisti.
Varisi thotë se dëshira për ta mbajtur gjallë këtë traditë, ia mund lodhjen.
“Nuk është e mundimshme për shkak se e bëjë me vullnet. I bëjë njëzet minuta ngjitje dhe njëzet minuta lëshimi nga kalaja. Për mua nuk është ndonjë peshe. Arsyeja që nuk po lodhem është edhe dëshira, emocionet dhe vullneti që po e humbë edhe lodhjen”, thotë ai.
Njëzetetetë vjeçari thotë se një veprim të tillë, e gjen vetëm në Prizren.
Kjo sipas tij, e bën edhe më të veçantë.
“Është emocion i veçantë, ndjehem special sepse në asnjë Komunë tjetër të Kosovës nuk ka ndonjë aktivistë apo praktikantë që e bënë këtë aktivitet. Emocionet e qytetarëve janë të shumta janë më shumë të gëzimit e lumturie që po ndodh diçka e tillë në Komunën e tyre”.
Ndryshe, gjatë muajit të shenjtë të Ramazanit, prizrenasit më parë lajmëroheshin se mbaroi dita e agjërimit, përmes gjuajtjes me “Topin e Iftarit”.
