Në një mbrëmje festive me shumë sportistë prizrenas, u përmbyll të martën mbrëma, vizita e anëtarëve të Komitetit të Vlerësimit nga organizata ACES në qytetin e Prizrenit.
“Atmosferë sportive, energji pozitive dhe krenari për arritjet e sportistëve tanë. Një përfaqësim që forcon kandidaturën e Prizrenit për titullin e madh: “Qyteti Evropian i Sportit 2026”, u tha me këtë rast nga folësit. “Sporti është frymëzim, bashkim dhe identitet , Prizreni e ka dëshmuar këtë”.
Në mesin e shumë pjesëmarrësve-sportistë, prezent ishte edhe Mirsad Çollaku, kryetar i Lidhjes Rajonale të Futbollit, në Prizren dhe anëtar i Komitetit Ekzekutiv.
“Futbolli do të jetë një nga aktivitetet kyçe vitin e ardhshëm, në këtë aktivitet të rëndësishëm dhe këtu LRF-ja e Prizrenit, do të jap kontributin”, ka thënë ndër të tjera, me këtë rast, Çollaku.
Çollaku shoqërohej nga nënkryetari Sami Buqaj, sekretari Bashkim Kajdomçaj, Erxhan Dana e bashkëpunëtorë të tjerë nga LRF-ja, të dëshmuar ndër vite për kontributin dhënë futbollit.
