Sigal Prishtina është e vendosur ta barazoj serinë gjysmëfinale të play-offit të Superligës së Kosovës në basketboll kundër Trepçës.
Pas tri ndeshjeve të luajtura deri më tani në këtë seri, rezultati i përgjithshëm është 2:1 në favor të Trepçës kurse ndeshja e katërt mes këtyre skuadrave luhet sot.
Në kryeqytet prej orës 19:00, Sigal Prishtina pret Trepçën, që synon ta mposht për ta barazuar serinë në 2:2 dhe të siguroj ndeshjen e pestë gjysmëfinale që luhet në Mitrovicë këtë vikend, ku do të përcaktohet finalisti.
Në tri ndeshjet e luajtura deri më tani, Trepça i ka fituar dy në Mitrovicë dhe e ka humbur një në Prishtinë, ku do ta luaj duelin e katërt.
Përderisa Sigal Prishtina kërkon ta barazoj serinë gjysmëfinale, Trepça kërkon finalen pasi me fitore eventuale në ndeshjen e katërt do ta eliminonte ekipin nga kryeqyteti.
Pas ndeshjes së tretë të luajtur në Mitrovicë, Prishtina bëri akuzë të rëndë ndaj gjyqtarëve, që ishin të huaj.
Po ashtu, paraqiti ankesë për një treshe të amerikanit të Trepçës, Tekele Cotton, por që ankesa e Prishtinës është refuzuar edhe pse Komisioni i Garave të FBK-së, pranoi se treshja ishte shënuar pasi kishte përfunduar koha e aksionit.
Prishtina në fazën e play-offit është futur nga seria çerekfinale, ku e ka eliminuar Vëllaznimin kurse Trepça si e dyta në stinorin e rregullt është kualifikuar direkt në gjysmëfinale.
Ndeshja që luhet në mbrëmje në Prishtinë, pritet të jetë interesante dhe me një atmosferë të zjarrtë pasi klubi vendas pret përkrahje të madhe nga tifozët.
