Autori: Jona Kelmendi
Këtë të martë në Qendrën e Transfuzionit të Gjakut në Prishtinë, qytetarët po i përgjigjen thirrjes së stafit të qendrës për të dhuruar gjak.
Kjo pas një njoftimi nga kjo qendër, për nevojë urgjente për gjak, në veçanti për grupet A dhe B.
Mes tyre janë edhe ata që e kanë kthyer dhurimin e gjakut në një zakon.
“Është hera e 14 që dhuroj gjak. Është një ndjenjë shumë e mirë për arsye se një gjest shumë i vogël, por i shpëton jeta dikujt atëherë ndihem mire”, Ka thënë njëri nga dhuruesit.
Po ashtu edhe Fjolla Hana, shprehet se dhurimi i gjakut është një mënyrë e thjeshtë për të ndihmuar dikë tjetër.
“Është një diçka që familja jeme e kanë bo prej moti, masanej une veq kom vazhdu në hapat e tyne, se si e vogël kom ardh me ta e kom kqyr si procedurë edhe gjithë mu ka dok si diqka që nuk të kushton ty kurgjo e për dikon tjetër është vijë e jetës që mundet me mbajt gjallë dikon edhe kom pa vendos që kur të rritem edhe kom mundësi me jep gjak kom me fillu me dhon gjak edhe une vet”, është shprehur dhuruesi tjetër.
Doktoresha Kymetana Bela Malaj thotë se mungesa e disa grupeve të gjakut është për shkak të rasteve të rënda.
“Kemi pas mungesë të disa grupeve të gjakut për shkak të kërkesave, për shkak të rasteve që kanë qenë te na, aksidente të shumta psh një rast i randë me gjakderdhje të randë, kujdestari të randa kemi pas kërkesa të shumta të cilat na kanë ulë numrin e dozave rezervë që i kemi pasë këtu të na”, është shprehur doktoresha Kymetana Bela Malaj.
Ajo gjithashtu shton se një rast i komplikuar mund të shterojë rezervat e gjakut.
“Asnjëherë nuk është e njëjtë. Kemi prej Emergjencës, aksidente të shumta, Gjinekologji mbrëmë e kemi pasë një rast shumë të randë, Kirurgjia, Kardiokirurgjia, në përgjithësi këto rastet ku kërkohen doza më të mëdha për çdo ditë kemi kërkesa prej krejt reparteve të Kirurgjisë por psh. për një pacient një rast më i komplikum mundet me na i qit në zero rezervat që i kemi”, është shprehur tutje doktoresha.
Nga Qendra e Tranfuzionit të Gjakut u bënë thirrje qytetarëve që gëzojnë shëndet të mirë të dhurojnë gjak, derisa ekipet e tyre do të jenë edhe të mëkurën në sheshin “Nënë Tereza” në Prishtinë, nga ora 10:00 deri në 17:00.
