Skuadra e Prishtinës që ka pasur një start të mirë këtë sezon në Superligën e Kosovës në futboll, ka forcuar radhët e veta me një futbollist tjetër të huaj.
Bëhet fjalë për reprezentuesin e Nigerit, Najeeb Yakubu, i cili luan në pozitën e mesfushorit të krahut të djathtë.
24-vjeçari pritet të jetë përforcim shtesë për Prishtinën, duke pasur parasysh karrierën e tij para se të transferohet në Kosovë.
Yakubu ka bërë karrierë në Ukrainë te Vorskla Poltava dhe në Finlandë te skuadra Ilves, ndërsa me Kombëtaren e Nigerit ka regjistruar 5 paraqitje deri më tani.
Pas tri ndeshjeve të luajtura deri më tani në elitën e futbollit kosovar, Prishtina ka regjistruar dy fitore dhe një barazim.
Ka tubuar shtatë pikë sa i ka edhe Ballkani në pozitën e parë, por ekipi nga Suhareka ka edhe një ndeshje më shumë të luajtur.
Yakubu pritet të debutoj te Prishtina në ndeshjen kundër Ballkanit, e cila luhet pas dhjetë ditësh në Suharekë dhe i takon xhiros së pestë të Superligës së Kosovës në futboll.
