Sigal Prishtina ka fituar derbin e xhiros së 19-t të Superligës së Kosovës në basketboll, pasi e ka mposhtur Pejën.
Të dielën në kryeqytet, Prishtina fitoi me rezultatin e ngushtë 75:74 për ta regjistruar fitoren e pestë rresht.
Tani, Prishtina ka 30 pikë, një më shumë se Peja që regjistroi humbjen e nëntë këtë sezon.
Ndeshja e luajtur në Pallatin e Rinisë dhe Sporteve ishte tejet interesante dhe me plot emicione, pasi Prishtina e siguroi fitoren në sekondat e fundit.
Në fakt, Peja pati rastin për të fituar por tentimi i Arti Hajdarit për tri pikë nuk ishte i saktë.
Prishtina i fitoi dy çerekët e parë, ndërsa Peja ishte më e mirë në dy periudhat e fundit.
Qendra Rashid Mahalbashiq me 15 pikë e 11 kërcime ishte më efikasi te Prishtina kurse te Peja, u veçua Dardan Berisha, që ndeshjen e përfundoi me 14 pikë, 6 kërcime e 2 asistime.
Vlen të përmendet se pas përfundimit të çerekut të dytë, tribuna ku ishin tifozët e Prishtinës u zbraz për shkak të fyerjeve në kor.
