Sigal Prishtina dhe Vëllaznimi përballen në ndeshjen vendimtare të serisë çerekfinale të Superligës së Kosovës në basketboll.
Të dyja skuadrat nuk kanë opsion tjetër veç fitores, nëse duan të avancojnë në gjysmëfinale të play-offit. Aktualisht, rezultati i përgjithshëm është 1:1 pas dy ndeshjeve të zhvilluara dhe skuadra që e fiton ndeshjen e tretë do të kualifikohet në gjysmëfinale, ku e pret përballja me Trepçën.
Dueli i tretë ndërmjet Prishtinës dhe Vëllaznimit, luhet sot prej orës 20:00 në Pallatin e Rinisë dhe Sporteve në kryeqytet.
Si Prishtina ashtu edhe Vëllaznimi janë të motivuar për këtë ndeshje, e cila do të jetë e fundit këtë edicion për skuadrën humbëse. Në serinë çerekfinale, skuadra që regjistron dy fitore kalon në gjysmëfinale, seri kjo që luhet me tri fitore dhe mund të shkojë deri në pesë ndeshje.
Megjithatë, Prishtina do të jetë e motivuar pasi në këtë përballje futet pas triumfit në Ligën Ballkanike, garë të cilën e fitoi për herën e tretë në histori të klubit.
Po ashtu, Prishtina do të jetë e kompletuar pasi të gjithë lojtarët janë rikuperuar nga lëndimi dhe janë në dispozicion të trajnerit Albert Sylejmani.
Këto dy skuadra edhe në stinorin e rregullt kanë pasur bilanc të barabartë, me dy fitore të Prishtinës karshi dy të Vëllaznimit në katër përballjet që i kishin mes vete.
Megjithatë, Prishtina përfundoi e katërta në tabelë me 44 pikë, tri më shumë se Vëllaznimi që doli i pesti. Për ekipin nga Gjakova, kjo është hera e dytë rresht që po paraqitet në garat e play-offit, ndonëse edicionin e shkuar u eliminua në serinë çerekfinale.
