Komisioni Disiplinor i Federatës së Futbollit të Kosovës ka marrë vendim për të gjobitur klubin FC Prishtina me shumën prej 1200 euro, për shkak të lëshimeve në organizimin e ndeshjes ndaj FC Drita.
Sipas raportit zyrtar, xhirimeve televizive dhe fotografive të siguruara nga delegati i ndeshjes, tifozët vendas “Plisat” kanë hedhur rreth 30 mjete piroteknike (plasëse) në minutat 32, 37, 38, 40 dhe 51 të ndeshjes, në hapësirën prapa portës.
Përveç kësaj, dy flakadanë janë hedhur drejt në fushë, konkretisht në zonën e 5-metershit, duke shkaktuar dëmtim të sipërfaqes së fushës.
Duke u mbështetur në nenin 6 paragrafi 1 pika C dhe nenin 18 paragrafi 2 pika C të Rregullores Disiplinore, Komisioni ka vendosur që Prishtina të dënohet financiarisht.
Klubi ka afat tetë ditë për të kryer pagesën nga momenti kur vendimi bëhet i plotfuqishëm.
Vendimi i plotë i Komisionit Disiplinor:
“FC “Prishtina“. Lëshim në organizmin e ndeshjes, tifozët vendas “Plisat“ kanë hedhur mjete pirotekinike (plasëse), në min 32,37, 38,40,51 prapa portës janë hedhur afërisht rreth 30 mjete të tilla dhe dy flakadane janë hedhur në fushë në zonën e 5 metershit, me ç’ rast është dëmtuar fusha. Sipas raportit zyrtar, xhirimit televiziv dhe fotove të siguruara nga delegatit të ndeshjes, Prishtina – Drita. Bazuar në nenin 6 paragrafi 1 pika C dhe neni 18 paragrafi 2 pika C të Rregullores disiplinore; Dënohet me shumë prej 1200 euro. Afati i pagesës është tetë ditë kur vendimi bëhet i plotfuqishëm”.
