Ka muaj që është formuar, por që një javë ka hapur thirrjen për vullnetarë.
Është kjo Shoqata Vullnetare për Zjarrfikje dhe Shpëtim në Komunën e Prishtinës.
Detaje rreth kësaj nisme dha për televizionin, kryetari i saj, Bajram Rexhepi.
“Pas regjistrimit kur bëhen një numër i caktuar 20 apo 30 një grup, trajnimet duhet me i ndjek njësoj si zjarrfikësit profesionist se zjarri është i njëjtë për dy palët. Kemi bashkëpunim të mirë edhe me AME të cilët na kanë premtuar që do të na ndihmojnë rreth trajnimit, se trajnimet duhet me u krye në akademinë në Vushtrri”, shprehet Rexhepi.
Nga kjo shoqatë treguan edhe benefitet që do të kenë vullnetarët e rinj.
“Shumë hezitojnë pa e ditë dhe pa e ndje atë ndjenjën e të qenurit zjarrfikës, provojeni ejani tek ne regjistrohuni keni me pa qe nuk keni me u zhgënjyer. Zjarrfikësit vullnetar nuk marrin pagesa të rregullta, por nëse ne i ftojmë ata për ato orë pune paguhen njëjtë si zjarrfikësit profesional, pra nuk ka pagë të rregullt nëse ka punuar dhjetë orë paguhet për ato orë e rregullisht jo”, tha ai.
Edhe sipas drejtorit për Siguri dhe Emergjenca, Lulzim Fushtica në kryeqytet ka pasur nevojë për një shoqatë të tillë.
“Ndihma që do të ofrojë shoqata do të jetë jashtëzakonisht e madhe do t’ia lehtësojë punë brigadës profesionale dhe do të ndihmojë kryeqytetin e drejtorin për ngritjen e kapacitete operative në trajtimin e këtyre rasteve. Në kuadër të shoqatës do të jenë tri njësi, njësia për zjarrfikje dhe shpëtim, njësia për kërkim dhe shpëtim malor si dhe njësia për kërkim dhe shpëtim në ujë”, thotë Fushtica.
Si të nevojshme, formimin e shoqatave të tilla po e shohin edhe nga Agjencia për Menaxhimin Emergjent.
“Ka shoqata vullnetare në disa Komuna, sepse është iniciativë që duhet të merret nga niveli Komunal. Disa nga Komuna i kanë marrë iniciativat edhe të integruara në forcë të tyre. Mirëpo, kjo mbetet një çështje që duhet të zhvillohet në të ardhmen në të gjitha Komuna e Kosovës”, tha Genc Metaj, drejtor i AME-së.
Marrë parasysh rastet e fundit të zjarreve në vend, nga po kjo agjenci bëjnë apel të shtuar te qytetarët që të jenë më të kujdesshëm.
