Mijëra nxënës sot iu drejtuan bankave shkollore.
Por, një pjesë e tyre nuk përfituan nga subvencionimi për tekstet mësimore.
Kjo meqë, në aplikimin e Ministrisë së Arsimit nuk janë përfshirë nxënësit që vijojnë mësimet në ciklin parashkollor.
Mos përfshirjen e të vegjëlve në këtë skemë, prindërit po e shohin si veprim jo të drejtë.
“Nuk është mirë sepse unë për vajzën e madhe i kam tërheq të hollat për librat e klasës së pestë, e për këta vogëlushët nuk ka. Nuk është mirë sepse dikush nuk ka mundësi me i ble libra diku rreth 20- 25 euro po u bëfshin për parashkollorë se ende nuk i kemi ble, por nuk është mirë nuk është mirë. Është kërkesë me i fut edhe parashkollorët për subvencione”, thotë Nazife Beiqi.
I lumtur për këtë fillim vit shkollor është edhe ky gjysh.
Por i njëjti, mendon se subvencionet duhet bërë për të gjithë nxënësit në vitet e ardhshme.
“Mendoj se duhet të subvencionohen të gjithë,megjithëse Ministria nuk i ka ndarë mjetet e mjaftueshme për të gjitha kategoritë e nxënësve. Kjo ka kaluar, por duhet me menduar për të ardhmen se çfarë ka kaluar nuk kthehet më,mirëpo për të ardhmen pse mos të subvencionohen edhe fëmijët parashkollorë”, shprehet Fadile Gashi.
Vlera e subvencionimit prej 80 eurove, sipas drejtorit të shkollës “Asim Vokshi” në kryeqytet, është e mjaftueshme për nxënësit nga klasa e parë deri në të nëntën.
Por, ai theksohen se nga ky subvencionim, duhet të përfitojnë edhe parashkollorët.
“Unë mendoj që kjo është e domosdoshme që të bëhet një ndryshim. Për arsye se si fëmijët e tjerë që janë në klasën e parë e të nëntë, po ashtu edhe këta janë fëmijët tanë dhe janë fëmijë të shkollave tona, kështu që edhe ata duhet të subvencionohen”, thotë Nazif Jashari – drejtor i shkollës.
Kurse edhe sipas njohësit të arsimit Rinor Qehaja, në ndryshimet e kurikulës duhettë përfshihet edhe kjo kategori e nxënësve.
“Rikujtojë që parashkollorët, tashmë janë hutuar me kurrikul të re dhe ndoshta kjo futja në kurrikul të re do të duhet të i paraprinte edhe një ndryshimi në legjislacionin aktual qe me hapë rrugë që Ministria me e hapë subvencionimin edhe për klasë përgatitore. E që përgatitorja ka një pako edukative që shpresoj shumë që të mos jetë një barrë e madhe financiare për prindërit”, shprehet Rinor Qehaja – njohës i arsimit.
Në lidhje me çështjen e mungesës së subvencionimit për librat të këtyre nxënësve, televizioni ka dërguar pyetje në ministrisë e Arsimit, mirëpo nuk ka pranuar përgjigje gjatë ditës.
