Edhe këtë vit, për blerjen e librave shkollorë po përdoret e njëjta praktikë.
Ministria e Arsimit vendosi që për furnizim me libra të nxënësve, të subvencionohen prindërit e tyre.
“Edhe sivjet tekstet mësimore dhe mjetet mësimore do të ofrohen sipas praktikës së vitit të kaluar, pra subvencionimit të prindërve të cilët do të kenë mundësi të aplikojnë që nga nesër….unë pres që nesër kur të hapet platforma, prindërit kanë me apliku në afatin më të shkurt të mundshëm dhe para vitit shkollor të bëhet ribursimi i mjeteve”, ka thënë Nagavci.
Megjithatë nuk dihet akoma as kosto e përgjithshme dhe as çmimi i librave.
“Shumat për 1 deri në pesë janë 80 euro, kjo varet prej numrit të aplikimeve, mendoj që ky është kalkulim i lehtë, veç për ta sqaruar si procedurë, ne kemi takim me shtëpitë botuese të cilat do të obligohet t’i publikojnë të gjitha çmimet, ne nuk mund të predikojmë për kosto përderisa nuk i kemi çmimet përfundimtare të shtëpive botuese me të cilët kemi takim”, është shprehur zëvendësministri Taulant Kelmendi.
Por për SBASHK-un nuk paraqet problem kjo çështje, nëse Ministria furnizon në kohë nxënësit me libra.
“E kanë vlerësu që koha është e mjaftueshme që nga dita e nesërme me fillu me u pajisë me libra dhe 2 shtatori i gjen nxënësit me libra, për neve është në rregull”, ka thënë Ymer Ymeri nga SBASHK.
Televizioni ka tentuar të marrë një përgjigje edhe nga Këshilli i Prindërve të Kosovës, por të njëjtit nuk kanë kthyer përgjigje.
Mirëpo për këtë çështje të shqetësuar janë shprehur nga Asociacioni i Komunave të Kosovës.
“Drejtorët komunal të arsimit shprehën brengën që më 1 shtator nxënësit nuk do i kenë të gjitha librat shkollor, bazuar në kohën e shkurtë në dispozicion deri më 1 shtator dhe praktikën e vitit të kaluar. Ka pasur kërkesa nga drejtorët komunal, bazuar në përvojat e tyre, që procesi i shpërndarjes së teksteve mësimore të bëhet duke i dërguar drejtpërdrejtë nëpër shkolla sepse MASHTI i posedon të gjitha informatat për numrin e nxënësve për secilën shkollë”, është shprehur Sazan Ibrahimi nga AKK.
Nga subvencionimi për tekstet dhe mjetet shkollore pritet të përfitojnë 218689 nxënës, ku përfshihen edhe 5 vjeçarët që janë regjistruar në klasën e parë.
