Përfaqësuesit e institucioneve të vendit kanë deklaruar se bllokimi i rrugëve është realizuar nga grupet kriminale, për të cilat kanë thënë se janë të instrumentalizuara nga Beogradi zyrtar.
Madje, deputeti i Lëvizjes Vetëvendosje, Armend Muja, përmes një reagimi në “Facebook”, ka kërkuar që këto grupe të shpallen edhe terroriste.
“Severna Brigada dhe Civilna Zaštita duhet të shpallen organizata terroriste. Qytetarë tanë në komunat veriore vazhdimisht informojnë që operativët kryesorë të këtyre bandave të armatosura dhe prapa barrikadave janë: Milan Radoičić, Zvonko Veselinović, Radule Stević, Aleksandar Filipović, Nenad Djurić…”, ka thënë Muja.
E Kodi Penal i Republikës së Kosovës, në kapitullin e 14 liston veprat të cilat përkufizohen si terrorizëm, në mesin e të cilave janë: marrja e pengjeve, rrëmbimi ose privimi i kundërligjshëm nga liria, shkaktimi i rrezikut të përgjithshëm; zjarrvënia apo djegia ose shpërthimi nga pakujdesia ose përdorimi i eksplozivëve ose mjeteve të tjera vdekjeprurëse etj.
Profesori i së Drejtës Penale Ismet Salihu, thotë se veprimet që po bëjnë grupet e caktuara në veri të vendit përbëjnë akte terroriste.
“Fjala terror, terrorizëm rrjedh prej fjalës latine që do me thënë shkaktimi i frikës, i pasigurisë, i ankthit, etj. Zakonisht aktet terroriste janë të drejtuara ndaj individëve, por edhe më shpesh ndaj strukturave shtetërore … në rastin tonë, mjerisht në veri të Kosovës gjitha këto veprime që janë duke u zhvilluar në këto dy javët e fundit i kanë të gjitha elementet e veprës penale të terrorizmit ose thënë ndryshe janë akte terroriste”, deklaroi Salohu.
Disa nga personat që institucionet e Kosovës thonë se qëndrojnë prapa barrikadave në veri të vendit janë edhe në Listën e Zezë të Departamentit Amerikan të Shtetit.
Kronika e gazetarit Valmir Gallopeni.