Një nga një, i priti në zyrën e saj. Shefja e shtetit, Vjosa Osmani të mërkurën i ftoi në takim të gjithë liderët e subjekteve politike në vend.
I pari, kryeministri në detyrë dhe njëherësh kryetari i Vetëvendosjes, Albin Kurti qëndroi më shumë se dy orë brenda Presidencës.
Pas takimit, ai tha se do të bëjnë ç’mos për ta konstituar Kuvendin.
“Do të bëjmë çmos që në frymën e bashkëpunimit, me idenë e konsensusit apo kompromisit, ta realizojmë këtë gjë, në mënyrë që më pastaj të kalojmë te formimi i qeverisë së re”, ka thënë Kurti.
Pas Kurtit, në takim hyri edhe i pari i Partisë Demokratike të Kosovës, Memli Krasniqi.
Gjatë këtij takimi, Krasniqi tha se po pret për të parë nëse Vetëvendosje lëviz nga kryeneçësia e saj.
“Rikonfirmova qëndrimin dhe gatishmërinë e PDK-së për të luajtur rolin tonë në gjetjen e një zgjidhje të krizës politike, sidomos që tashmë kemi qartësi nga aktgjykimi i Kushtetueses. Aktgjykimi i ka bërë të qartë rolet e secilit. Në radhë të parë, koalicionin e parë e ka detyruar për gjetjen e kompromisit apo konsensusit. Shpresoj që këto konsulta të jenë në funksion të gjetjes së rrugëdaljes. Por mbetet që takimet e tjera që i ka planifikuar presidentja të na qartësojnë a ka apo s’ka ndryshim të kryeneçësisë politike të VV-së dhe Albin Kurtit që po e mbajnë të bllokuar Kuvendin”, ka thënë Krasniqi.
Për një orë në takim me bashkëpartiaken e dikurshme, qëndroi kryetari i LDK-së, Lumir Abdixhiku.
“Thelbi i problemit është që i takon partisë së parë, që të propozojë, por edhe të krijojë shumicën parlamentare. Në këtë vijë ne presim që zgjidhja të bëhet nëpërmjet insistimit për shumicë politike e pastaj për respektim të domosdoshëm të procedurave kushtetuese. Ne kemi një aktgjykim që thotë se zgjedhja e kryeparlamentarit bëhet sipas praktikave të deritanishme. LDK-ja nuk ka çështje të emrave sa i përket kandidatit, ka qëndrim parimor dhe me vullnet e bindje dëshiron të votojë kundër kandidatëve të VV-së”, ka thënë Abdixhiku.
I fundit që erdhi në Presidencë, ishte i pari i Aleancës për Ardhmerinë e Kosovës, Ramush Haradinaj.
Haradinaj tha se po presin të kthehen në votim të hapur.
Gjatë ditës së nesërme, Presidentja Osmani do të presë në takim partitë e tjera parlamentare.
Një takim me të gjithë liderët së bashku, ajo e organizoi edhe më 15 maj.
