Presidentja e Kosovës, Vjosa Osmani, ka nisur një raund të ri takimesh me liderët e partive politike në përpjekje për të dalë nga kriza e konstituimit të Kuvendit të Kosovës, proces i cili ka mbetur i bllokuar tash e disa javë.
Pas takimeve të mbajtura të mërkurën me liderët e partive kryesore – Albin Kurti (LVV), Memli Krasniqi (PDK), Lumir Abdixhiku (LDK) dhe Ramush Haradinaj (AAK) – Osmani pritet t’i vazhdojë konsultimet edhe gjatë ditës së sotme.
Bashkëkryetari i Guxo, Faton Peci, konfirmoi se është ftuar në takim me presidenten për të enjten në orën 09:00. Po ashtu, edhe deputetja nga komuniteti boshnjak, Duda Balje, bëri të ditur se ka pranuar ftesë për takim gjatë së enjtes.
Sipas një njoftimi nga Presidenca, presidentja Osmani u ka bërë thirrje liderëve politikë që të arrijnë pajtueshmëri sa më parë, përkatësisht brenda afatit 30-ditor të përcaktuar nga Gjykata Kushtetuese, për të konstituuar Kuvendin përmes zgjedhjes së Kryetarit dhe Nënkryetarëve.
Kriza aktuale ka paralizuar funksionimin e institucioneve të reja, ndërsa përpjekjet e presidentes synojnë të shmangin vonesa të mëtejshme në këtë proces jetik për vendin.
