Presidentja e Kosovës, Vjosa Osmani, e ka përkujtuar policin Enver Zymberi, në 12-vjetorin e vrasjes së tij, raporton teve1.info
Përmes një komunikate për medie të Presidencës, Osmani ka thënë se Policia e Kosovës janë mbrojtësit e palëkundur të kufijve të shtetit të Kosovës nga agresioni i vazhdueshëm i Serbisë.
“Dymbëdhjetë vjet më parë polici Enver Zymberi ra në mbrojtje të integritetit territorial të Kosovës. Sot e nderojmë guximin dhe sakrificën e heroit. Ai ishte mishërim i përkushtimit, guximit dhe vetëmohimit.
Atij, sikurse edhe të gjithë policëve të rënë në detyrë u përkulemi për kontributin e çmuar për sigurinë tonë në çdo cep të vendit.
Sikurse atëherë, ashtu edhe sot, Policia e Kosovës janë mbrojtësit e palëkundur të kufijve të shtetit tonë nga agresioni i vazhdueshëm i Serbisë, prandaj ata duhet jo vetëm të respektohen por edhe të vlerësohen e mbështeten maksimalisht për punën dhe sakrificën e tyre”, thuhet në shkrimin përkujtues të Presidentes Osmani.
