Kanë mbetur vetëm edhe pak orë deri në përfundimin e afatit.
Posa të bëhet mesnata mes të martës dhe mërkurës, sistemi mbyllet dhe asnjë deklarim për pasuri nuk mund të bëhet më prej asnjë zyrtari publik.
Ata që brenda këtij 30 ditëshi nuk e kanë përmbushur këtë obligim ligjor, do të përballen me pasoja.
“Këta me siguri do të jenë kandidatë potencialë serioz për gjobë sepse nëse nuk e deklarojnë brenda afatit të përcaktuar deri në mesnatën e sotme, të gjithë këta do të pranojnë një gjobë të mandatuar prej 30% të pagës mujore të tyre, ndërsa ata që kanë filluar shpresoj se deri në fund të orarit të caktuar me ligj dhe në fund të ditës, do ta deklarojnë pasurinë dhe rrjedhimisht edhe ta kryejnë obligimin ligjor por në anën tjetër, edhe të tregojnë seriozitet dhe zbatim të ligjit, transparencë e llogaridhënie ndaj publikut të gjerë”, ka thënë Buleshkaj.
Pas kësaj gjobe, nëse zyrtarët publik nuk e deklarojnë pasurinë brenda 15 vitëve vijuese, sipas Ligjit, bëhen subjekt i hetimit penal.
Nga KDI thonë se përmbushja e këtij obligimi ligjor, ndikon në shmangien e veprave korruptive.
“Secili zyrtar tregon për prejardhjen e pasurisë së vet dhe normal që kontribuon pak edhe ruajtjes nga ndoshta joshja për afera apo për qëllime jo të mira, të cilat dëmtojnë buxhetin, dëmtojnë resurset tona publike, integritetin e proceseve dhe rrjedhimisht do të thotë të mos shkaktojnë një vepër korruptive”, u shpreh Metushi.
Të dhënat që do të derivojnë nga procesi i deklarimit, do të bëhen publike pas një muaji.
“Deri në fund të muajit prill, por jo më larg se fillimi i muajit maj do të jenë të qasshme të gjitha regjistrat për publikun e gjerë. Do të jenë të qasshëm në uebfaqen e Agjencisë dhe gjithë publiku mund t’i verifikojë dhe të shohë se si ka lëvizur pasuria e zyrtarëve publik, se si kanë qenë të hyrat po ashtu edhe pasuria e akumuluar në vitin e fundit”, ka thënë tutje Buleshkaj.
Trendi i deklarimit, sipas APK është sikurse viteve të kaluara, ku pjesa dërrmuese është kryer në ditët e fundit.
Ditën e fundit e kanë pritur edhe postet e larta, si kryeministri e presidentja.
