Presidenti sirian, Ahmed al-Sharaa ka arritur në Paris të mërkurën për vizitën e tij të parë në një vend evropian që nga marrja e detyrës, ka njoftuar agjencia shtetërore e lajmeve SANA.
Ai shkoi atje me ftesë të presidentit francez, Emanuel Makron.
Sharaa do të zhvillojë bisedime me Macronin, të përqendruara në rindërtimin e Sirisë dhe sulmet e përsëritura izraelite në territorin sirian, tha agjencia e lajmeve, duke cituar një burim nga Ministria e Informacionit.
Diskutimet pritet të përqendrohen në zhvillimin ekonomik dhe rindërtimin, me një fokus të veçantë në sektorët e energjisë dhe aviacionit, raportoi SANA.
Me të mbërritur, Sharaa dhe Ministri i tij i Jashtëm Asaad al-Shaibani u takuan me Fared al-Madh’an, i njohur me pseudonimin “Cezari”, dezertuesi ushtarak që ekspozoi torturat dhe vrasjet masive nën regjimin e Asadit, tha presidenca siriane.
Në një intervistë televizive me Al Jazeera-n, ai përshkroi se si kishte kontrabanduar mijëra fotografi dhe dokumente që detajonin praktikat e torturës së regjimit të Asadit te mediat ndërkombëtare dhe grupet e të drejtave të njeriut.
Dezertuesi ndau afërsisht 11,000 imazhe të viktimave të vrarë nën tortura midis majit 2011 dhe gushtit 2013, duke hedhur dritë mbi abuzimin sistematik në qendrat e paraburgimit sirian gjatë sundimit të Partisë Baath.
