Presidentja e vendit, Vjosa Osmani ka pranuar një letër urimi nga homologu i saj gjerman Frank-Walter Steinmeier me rastin e festës së pavarësisë së Kosovës.
Osmani përmes një postimi në Facebook, ka thënë se në letrën e urimit, presidenti gjerman ka dhënë mbështetje institucioneve të Kosovën në agjenden e reformave dhe në luftën kundër krimit dhe korrupsionit.
“E falënderoj Presidentin e Gjermanisë, z. Frank-Walter Steinmeier, për urimin e përzemërt për shtetin tonë, në prag të festës së pavarësisë. Ai thekson se e mban mend mirë 17 shkurtin 2008, meqë atëherë ishte ministër i punëve të Jashtme të Gjermanisë dhe menjëherë ishte deklaruar pro njohjes së Kosovës. Për më tepër, ai i jep mbështetje të fuqishme institucioneve të Kosovës në agjendën e reformave dhe në luftën kundër krimit e korrupsionit, si një faktor qendror për zhvillim ekonomik dhe investime të reja”, ka shkruar ajo, transmeton tëvë1.info.
Osmani thotë se presidenti Steinmeier i ka ritheksuar përkrahjen e shtetit të tij për rrugën e Kosovës drejt arritjes së konsolidimit të plotë në arenën ndërkombëtare.
“Gjatë takimit tonë të fundit, kur me ftesë të tij e vizitova Gjermaninë zyrtarisht, Presidenti Steinmeier ritheksoi përkrahjen e palëkundur të shtetit të tij si dhe përkrahjen e tij personale për rrugën e Kosovës drejt arritjes së konsolidimit të plotë në arenën ndërkombëtare. Kosova është me fat që përgjatë rrugëtimit të saj sfidues ka pranë shtete si Gjermania dhe miq si Presidenti Steinmeier”, tha presidentja e Kosovës Vjosa Osmani.
Presidenti gjerman i ka thënë Osmanit se ka besim në angazhimin konstruktiv të Qeveerisë për bisedimet e ardhshme në kuadër të dialogut me Serbinë.
