Ish-ambasadori i Kosovës, Albert Prenkaj, ka kritikuar jokordinimin mes udhëheqësve më të lartë të vendit gjatë vizitave në Nju Jork, duke thënë se kjo po reflekton negativisht në politikën e jashtme të Kosovës.
Ai tha se takimet që janë realizuar në ShBA kanë qenë të pakoordinuara.
“Sivjet kemi një jokoordinim në mes të përfaqësuesve më të lartë të shtetit, pra të presidentes dhe këtyre që janë në mbajtje të detyrave, kryeministri gjegjësisht dhe ministres. Si rezultat kemi takime të ndryshme, të cilat nuk janë të koordinuara. Kjo len një shije të hidhur politikës së jashtme të Kosovës, për të cilën unë them që për sa kohë që Kosova nuk ka politikë të jashtme”, ka deklaruar ai.
Prenkaj tha se nuk do të ketë zbutje të qëndrimeve të ShBA-së karshi Kosovës edhe pas vizitave që janë realizuar atje.
“Kosova tashmë është nën sanksione nga Brukseli zyrtar dhe e kemi parë që ambasada e ShBA-së ka dërguar një letër që tregon pezullimin e dialogut strategjik, madje tashmë kemi edhe një letër që thotë se Kurti ka tejkaluar të gjitha vijat e kuqe. Unë nuk pres ndonjë zbutje nga qëndrimet e ShBA-së pas këtyre vizitave atje, meqenëse vizitat janë drejtuar në OKB, pra pjesëmarrja është në margjinat e Asamblesë dhe nuk kemi vizita në Uashingtonin zyrtar”, deklaroi ai. /teve1.info/
