Kandidati i Lëvizjes Vetëvendosje për kryetar të Fushë-Kosovës, Valon Prebreza, ka akuzuar administratën e komunës për keqpërdorime dhe kriminalizim të thellë gjatë qeverisjes.
Prebreza tha se dëmi ekonomik i shkaktuar nga keqmenaxhimi i tokës dhe ndërtimeve të paligjshme arrin miliona euro.
Ai theksoi presionin e madh që, sipas tij, ushtron administrata komunale mbi zyrtarët në sektorët e arsimit, shëndetësisë dhe institucionet e tjera.
“Askush nuk është marrë me Fushë-Kosovën, ku mendoj që është njëra prej komunave më të kriminalizuara në Ballkan. Ne si VV me asamblistët tonë kemi kallëzime penale që i kemi dërguar te Krimet Ekonomike, ku janë lëndë të shumta. Për çudi shumë pak kanë thirr prej Krimeve Ekonomike që tetë vitet e fundit”, deklaroi ai në emisionin “Këndi i Debatit” në Tëvë1.
Ai gjithashtu kritikoi auditorin e komunës, duke thënë se mbi 60 lëndë të deponuara nga zyra e auditimit nuk janë trajtuar ende.
“Ne kemi një auditor të Komunës së Fushë-Kosovës, i cili vetëm ai si person përgjegjës i zyrës së auditivit i ka mbi 60 lëndë të deponuara edhe nuk ka ndërmarrë asnjë gjë. Kjo është çudi”, deklaroi ai.
Më 9 nëntor, në balotazh do të përballet Prebreza me Besnik Osmanin e LDK-së.
Në raundin e parë më 12 tetor, Prebreza doli i pari me 45.15 për qind të votave, ndërsa Osmani i dyti me 36.66 për qind. I treti ishte Rrahim Tërnava i PDK-së me 16.15 për qind. /teve1.info/
