E ngarkuara me punë në ambasadën amerikane në Prishtinë, Anu Prattipati ka kërkaur nga kryeministri në detyrë, Albin Kurti që udhëheqësit politik të marrin përgjegjësi dhe të punojnë së bashku për formimin e institucioneve të Kosovës.
Sipas njoftimit të publikuar nga ambasada ajo u ka bërë thirrje politikanëve në Kosovë që të lënë anash ndarjet politike dhe të përmbushin mandatin e dhënë nga qytetarët.
Siç thuhet, Prattipati ka thënë se bllokimi i formimit të institucioneve kërcënon integritetit e procesit demokratik.
“ E ngarkuara me punë , Anu Prattipati, u takua sot me Kryeministrin në detyrë, Albin Kurti, për të theksuar nevojën urgjente që udhëheqësit politikë të Kosovës të marrin përgjegjësi dhe të punojnë së bashku për të zgjidhur ngërçin institucional të vazhdueshëm. Ajo theksoi se një demokraci funksionale kërkon që të gjithë qytetarët të kenë mundësinë të zgjedhin lirisht përfaqësuesit e tyre. Bllokimi i partive politike legjitime, qoftë përmes taktikave politike apo pengesave procedurale, kërcënon integritetin e procesit demokratik. E ngarkuara Prattipati u bëri thirrje të gjithë udhëheqësve që të lënë mënjanë ndarjet dhe të përmbushin mandatin që u është besuar nga populli i Kosovës”, thuhet nga ambasada amerikane.
Prattipati gjatë javës ka takuar edhe liderët e partive opozitare.
